Հայտնի մարդիկ ակտիվորեն գովազդում են արհեստական բանականությամբ (ԱԲ) զբաղվող ընկերությունները: Աշխարհի ամենահայտնի դեմքերից մեկը՝ Լիոնել Մեսսին, Աշխարհի առաջնության շրջանակում գովազդային արշավ է իրականացրել OpenAI-ի համար, գրում է Futurism-ը։ Ոմանք, կարծես, իսկապես հմայված են տեխնոլոգիայի ընձեռած հնարավորություններով, իսկ մյուսները պարզապես խոշոր հոնորարներ վաստակելու առիթը բաց չեն թողնում։ Բայց ինչո՞ւ է այս միտումը շարունակվում, նույնիսկ երբ հանրությունը բացահայտ դժգոհություն է հայտնում։
Այս հարցին պատասխանելու համար թերևս լավագույն օրինակը Չարլզ Պորչն է, ում New York Magazine-ը վերջերս անվանել էր «OpenAI-ի հոլիվուդյան միջնորդ»։
Պորչը 15 տարի աշխատել է Instagram-ում, որտեղ նրա հիմնական խնդիրն էր ճանաչված ու ազդեցիկ դեմքերին ներգրավել հարթակ՝ այն վերածելով ժամանակակից մշակութային խոշոր կենտրոնի։ 2025 թվականին OpenAI-ի գլխավոր տնօրեն Սեմ Ալթմանը վարձեց Պորչին, որպեսզի նա նույնն անի ChatGPT-ի համար։ Նրա ներգրաված առաջնակարգ աստղերի թվում է դերասանուհի Գվինեթ Փելթրոուն. Պորչը սեպտեմբերին կազմակերպել էր նրա և Ալթմանի ընթրիքը (այն բանից հետո, երբ այդ հանդիպման մասին լուրերի շուրջ բարձրացած հանրային աղմուկի պատճառով այն հետաձգվել էր)։
Իրեն «տեխնոլոգիական լավատես» համարող Պորչը նշում է, որ ինքը ոչ թե բիզնեսի զարգացման կամ բրենդավորման մասնագետ է, այլ «կապեր հաստատող այն անձը, որը բոլորին ծանոթացնում է նոր տեխնոլոգիաներին»։ Ընդ որում, այդ «բոլորը» բացառապես որոշակի եկամուտ և Instagram-ում հարյուր հազարավոր հետևորդներ ունեցող մարդիկ են։
Այսպիսով, ինչո՞ւ են հայտնիները գայթակղվում արհեստական բանականությամբ։ Պատճառներից մեկն այն է, որ ԱԲ ընկերությունները դրա համար հսկայական ֆինանսական միջոցներ ու նպատակաուղղված ջանքեր են ներդնում։ Հանրային դեմքերն հաճախ են հայտնվում նման թիրախում։ Հենց դա է պատճառը, որ նրանցից շատերը դիմում են կասկածելի բժիշկների, հարում են տարօրինակ կրոնական ուղղությունների կամ վարկաբեկում են իրենց՝ սատարելով այնպիսի անհատների կամ բրենդների, որոնք լիովին անհատական են կամ հակասում են իրենց իսկ որդեգրած արժեքներին։ (Հոլիվուդում վերջին վառ օրինակը ռեժիսոր Մարտին Սկորսեզեի աջակցությունն էր ԱԲ-ով կադրավորում իրականացնող ստարտափին)։
Սակայն այս ամենն ունի նաև ավելի մութ կողմ, որի մասին բացահայտում է մեդիա ոլորտի անանուն ղեկավարներից մեկը։ Փաստն այն է, որ հայտնիները, հատկապես դերասանները, այսօր ավելի քան երբևէ ֆինանսական անկայունության և անօգնական վիճակում են։
«Այսօր Հոլիվուդում աշխատանք ունեն միայն ամենաբարձր վարկանիշ ունեցողները,- NYMag-ին հայտնել է մեդիա ոլորտի ներկայացուցիչը։ - Ահա թե ինչու է Ռոբերտ Պատինսոնը նկարահանվում գրեթե բոլոր նախագծերում, կամ Նիկոլ Քիդմանը հայտնվում է հեռուստատեսային բոլոր նախագծերում։ Իսկ հաջորդ օղակի դերասանները պարզապես աշխատանք չեն գտնում»։
Դժվար չէ հասկանալ դրան նպաստող պատճառը։ Տեխնոլոգիական ոլորտը թուլացրել է կինոարտադրությունը՝ ճիշտ այնպես, ինչպես Spotify-ի նման հարթակները քամում են արվեստագետների ֆինանսական երակները։ Այժմ տեխնոլոգիական մեկ այլ նորամուծություն՝ արհեստական բանականությունը, սպառնում է վերջնական հարված հասցնել ոլորտին՝ ավտոմատացնելով ստեղծագործական աշխատանքի հսկայական ծավալ։ ԱԲ-ն չի կարող փոխարինել մարդկային տաղանդին ու երևակայությանը, բայց կարող է առաջարկել դրա միջին որակի փոխարինիչը։ Միևնույն ժամանակ, ԱԲ-ի առաջացրած անորոշությունը բավարար է, որպեսզի ոլորտի ղեկավարները զգուշանան և սկսեն խնայել յուրաքանչյուր լուման։ Արդյունքում՝ աշխատատեղերը կտրուկ կրճատվում են։
Եվ ահա, ԱԲ ոլորտը՝ իր անսահմանափակ ռեսուրսներով ու հսկայական ծախսերով, մուտք է գործում իր իսկ պատճառով առաջացած ավերակների տարածք։ Դրա մեջ ներդրվող ահռելի կապիտալն այնքան շլացուցիչ է, որ կարող է կուրացնել գրեթե յուրաքանչյուրին։
