Ինչու՞ են Երևանում ծառեր հատվում․ քաղաքապետարանը ներկայացրել է պարզաբանում

«Երբեմն հոգ տանել քաղաքի մասին նշանակում է ոչ թե բուժել հինը, այլ ընտրել նորը:

Երևանի քաղաքապետարանը տեսանյութ է հրապարակել, որտեղ ներկայացնում է մայրաքաղաքում ծառերի հատման պատճառները։

Տեսանյութում նշվում է, որ հատկապես թեղիները հիվանդ են․ դրանց բների ներսում առկա են հազարավոր նեմատոդներ՝ մանր որդեր, որոնք սնվում են ծառի հյուսվածքներով և աստիճանաբար թուլացնում այն։ Քաղաքապետարանի փոխանցմամբ՝ երբ ծառը կորցնում է դիմադրողականությունը, այն դառնում է խոցելի նաև թեղու տերևակերի և այլ միջատների նկատմամբ։

Նշվում է, որ միջատները ոչ միայն վնասում են տերևային զանգվածը, այլև կարող են ներթափանցել բնակելի տարածքներ՝ առաջացնելով ալերգիկ և այլ խնդիրներ։

Ինչու՞ չի իրականացվում բուժում

Քաղաքապետարանը պարզաբանում է, որ քիմիական բարձր չափաբաժիններով մշակումը ենթադրում է թունավոր նյութերի կիրառում, ինչը կարող է ռիսկեր ստեղծել մարդկանց համար։ Ըստ հաղորդագրության՝ նման միջամտությունը չի ապահովում արդեն իմունիտետը կորցրած ծառերի լիարժեք վերականգնումը։

Քաղաքապետարանի դիրքորոշմամբ՝ հիվանդ ծառերը փոխարինվում են դիմացկուն և ֆունկցիոնալ տեսակներով։

«Երբեմն հոգ տանել քաղաքի մասին նշանակում է ոչ թե բուժել հինը, այլ ընտրել նորը», – ասվում է տեսանյութում։

Հիշեցնենք, որ օրեր առաջ համացանցում տեսանյութեր էին տարածվել, որտեղ երևում էր, թե ինչպես են Ամիրյան փողոցում ծառերը արմատախիլ արվում։