Պուտինի հետ հանդիպման առաջին րոպեներին կհասկանամ այն հաջո՞ղ կլինի, թե՞ ոչ. Թրամփ

ԱՄՆ նախագահը շեշտել է, որ եթե հանդիպումը անհաջող լինի, այն շատ արագ կավարտվի:

Այսօր Ալյասկայում՝ Երևանի ժամանակով ժամը 23։00-ին, կկայանա Թրամփ-Պուտին հանդիպումը, որին անհամբեր սպասում է ամբողջ աշխարհը: Դա կլինի երկու երկրի ղեկավարների միջև առաջին անձնական հանդիպումը 2021 թվականի հունիսից ի վեր, երբ Պուտինը Ժնևում հանդիպել էր ԱՄՆ այն ժամանակվա նախագահ Ջո Բայդենի հետ։

Բացի այդ, Վլադիմիր Պուտինը կլինի առաջին ռուս առաջնորդը, որը կայցելի Ալյասկա, տեղեկացնում է Սպիտակ տունը։

ԱՄՆ նախագահ Դոնալդ Թրամփը հայտարարել է, որ Ռուսաստանի նախագահ Վլադիմիր Պուտինի հետ հանդիպման առաջին մի քանի րոպեից կկարողանա հասկանալ՝ արդյոք այն հաջող կլինի՞, և կհաջողվի՞ արդյոք մոտ ապագայում խաղաղություն հաստատել։

«Ես առաջին երկու, երեք, չորս կամ հինգ րոպեների ընթացքում կհասկանամ՝ այս հանդիպումը լա՞վ կլինի, թե՞ վատ»,- Սպիտակ տանը լրագրողներին ասել է Թրամփը։

ԱՄՆ նախագահը շեշտել է, որ եթե հանդիպումը անհաջող լինի, այն շատ արագ կավարտվի, իսկ եթե այն հաջող անցնի, ապա «մենք մոտ ապագայում խաղաղության կհասնենք»։

Միևնույն ժամանակ, ըստ Թրամփի, եթե ինքը չլիներ ԱՄՆ նախագահը, ռուսական կողմը, բանակցությունների փոխարեն, կկենտրոնանար «ամբողջ Ուկրաինան գրավելու» վրա։