Հայաստանում շարունակվում է գրիպի A(H3N2) ենթատեսակի շրջանառությունը․ սուր շնչառական վարակների ակտիվությունը նվազել է

ԾՍՇՎ դեպքերը կազմել են հոսպիտալացվածների ընդհանուր թվի 5.4%-ը։

Հայաստանի Հանրապետությունում շարունակվում է գրիպի A(H3N2) ենթատեսակի վիրուսների շրջանառությունը։ ԵՊԲՀ առողջապահության ծրագրերի ազգային գիտահետազոտական «Հերացի» կենտրոնը հրապարակել է սուր շնչառական վարակների (ՍՇՎ) ակտիվության ամփոփ տվյալները՝ 2026 թվականի 3-րդ շաբաթվա (հունվարի 12–18) կտրվածքով։

ԵՊԲՀ «Հերացի» թիվ 1 և «Մուրացան» հիվանդանոցային համալիրներում, ինչպես նաև Միքայելյան վիրաբուժության ինստիտուտում հոսպիտալացված դեպքերի վերլուծության համաձայն՝ նշված շաբաթվա ընթացքում գրանցվել է ծանր սուր շնչառական վարակների (ԾՍՇՎ) 46 նոր դեպք, ինչը 25.8%-ով պակաս է նախորդ շաբաթվա համեմատ։

ԾՍՇՎ դեպքերը կազմել են հոսպիտալացվածների ընդհանուր թվի 5.4%-ը՝ նախորդ շաբաթվա 9.7%-ի փոխարեն։ Դեպքերի տարիքային բաշխմամբ՝ 59%-ը գրանցվել է մինչև 5 տարեկան երեխաների շրջանում, իսկ 41%-ը՝ 5–14 տարեկանների։ Մեկ դեպք (մինչև 5 տարեկան երեխա) պահանջել է ինտենսիվ թերապիայի բաժանմունք ընդունում։

Նշված ժամանակահատվածում գրիպի նկատմամբ հետազոտվել է ԾՍՇՎ 11 նոր դեպք։ ԾՍՇՎ-ով հոսպիտալացվածների շրջանում մահվան դեպքեր չեն արձանագրվել։

Տարածաշրջանային մակարդակում՝ Եվրոպական տարածաշրջանում, 2026 թվականի հունվարի 5–11-ը գրիպի ակտիվությունը որոշակի նվազում է գրանցել, ինչը կապվում է արձակուրդային շրջանի հետ։ Հիվանդությունների վերահսկման և կանխարգելման եվրոպական կենտրոնի (ECDC) տվյալներով՝ գրիպով հոսպիտալացումների առավել մեծ բաժինը շարունակում է գրանցվել 65 և ավելի բարձր տարիքի անձանց շրջանում։

Տարածաշրջանում գրիպի A(H3) վիրուսը մնում է գերակշռող ենթատեսակը՝ 78%, միաժամանակ շրջանառվում է նաև A(H1) վիրուսը՝ 22%։

Գրիպի դրական թեստերի մակարդակը տարածաշրջանում կազմել է 33%՝ նախորդ շաբաթվա 39%-ի համեմատ, ինչը դեռևս գերազանցում է 10% համաճարակային շեմը։ 31 երկրի միջին ցուցանիշը կազմել է 32%, ևս 29 երկրներ արձանագրել են առնվազն 10% դրականություն։

SARS-CoV-2 վարակի ակտիվությունը տարածաշրջանային մակարդակում պահպանվում է ցածր՝ 2%։ Շնչառական սինցիցիալ վիրուսի (RSV) շրջանառությունը փոփոխություն չի կրել՝ կազմելով 7%, դեպքերի գերակշռող մասը գրանցվել է մինչև 5 տարեկան երեխաների շրջանում։