Հայաստանում տեղումները հասել են ամսական նորմայի մինչև 75%-ին՝ մեկ օրում

Տեղումների բնույթը պայմանավորված է եղել տեղանքի բարձրությամբ։

Մարտի 27-ից Հայաստանը գտնվել է հարավից ներթափանցած ակտիվ ցիկլոնի ազդեցության տակ։ Ամենաինտենսիվ փուլը գրանցվել է մարտի 27–28-ին, սակայն տեղումները շարունակվել են նաև հաջորդ օրերին՝ ընդգրկելով հանրապետության գրեթե ողջ տարածքը։

Տեղումների բնույթը պայմանավորված է եղել տեղանքի բարձրությամբ։ Լեռնային շրջաններում գերակշռել են ձյունն ու ձնախառն անձրևը, իսկ նախալեռնային և հովտային գոտիներում՝ անձրևը։

Ամենաբարձր ցուցանիշները գրանցվել են Սյունիքի մարզում։ Մարտի 27-ին Կապանում մեկ օրում տեղացել է 47 մմ տեղում, ինչը կազմում է ամսական նորմայի շուրջ 75%-ը։ Մարզի այլ բնակավայրերում նույն օրը գրանցվել է 15–32 մմ տեղում։

Մարտի 27–30-ն ընկած ժամանակահատվածում հանրապետության տարբեր շրջաններում տեղումների քանակը կազմել է 15–25 մմ, Սյունիքում՝ մինչև 49 մմ։ Երևանում արձանագրվել է 19–22 մմ տեղում։

Մարտի 30-ին մայրաքաղաքում մեկ ժամում գրանցվել է 8–9 մմ տեղում, ինչը բնորոշվում է որպես հորդառատ անձրև։

Տվյալները ցույց են տալիս կարճ ժամանակահատվածում տեղումների ինտենսիվ կուտակում, ինչը կարող է ազդեցություն ունենալ ջրային հոսքերի, ենթակառուցվածքների և ռիսկերի կառավարման վրա։