Հայաստանում այս պահի դրությամբ հնարավոր չէ բարձրացնել կենսաթոշակները․ Թորոսյան

Աշխատանքի և սոցիալական հարցերի նախարարը նշում է, որ այս պահին կենսաթոշակների հետվճարային ծրագրից օգտվում է 350 000 քաղաքացի։

Հայաստանում այս պահի դրությամբ հնարավոր չէ բարձրացնել կենսաթոշակները։ Այս մասին ԱԺ աշխատանքի և սոցիալական հարցերի ու ֆինանսավարկային և բյուջետային մշտական հանձնաժողովների համատեղ նիստում 2026 թ․ պետական բյուջեի նախնական քննարկման ժամանակ ասաց աշխատանքի և սոցիալական հարցերի նախարար Արսեն Թորոսյանը։

Նա հիշեցրեց հոկտեմբերի 29-ին ֆինանսների նախարար Վահե Հովհաննիսյանի արած հայտարարությունը` կապված կենսաթոշակների բարձրացման հետ և ընդգծեց, որ արդեն երկու օր է` այն շահարկվում է։ Նախարարը նշել էր, որ եթե կենսաթոշակները բարձրացնեն այնքան, որ ֆիսկալ անկայունություն առաջանա երկրում և բյուջետային, հարկաբյուջետային խնդիրներ լինեն, ապա ոչ միայն կենսաթոշակառուները, այլև բոլորը վատ կապրեն։

«Մանիպուլացվում է հակառակ կերպ։ Իբրև թե, եթե կենսաթոշակները բարձրացվեն, ապա կենսաթոշակառուները վատ կապրեն։ Ամենևին դրա մասին չէր խոսքը, այլ այն մասին, որ մեր ֆիսկալ հնարավորությունները թույլ են տալիս բարձրացնել այսքան ու այս եղանակով։ Կարծում ենք, որ այս պահի դրությամբ ավելին հնարավոր չէ, ու սա նաև գործիք է, որը խթանելու է հավելյալ հարկերի հավաքագրմանը»,- նշեց Թորոսյանը։

Նա ընդգծեց, որ այս պահին ՀՀ-ում 350 000 քաղաքացի օգտվում է կենսաթոշակների հետվճարի ծրագրից։ Նախարարը շեշտեց՝ իրենք խրախուսում են, որպեսզի ավելի մեծ թվով քաղաքացիներ օգտվեն այդ ծրագրից։ Ըստ նախարարության կանխատեսումների՝ մյուս տարվա վերջին այդ քաղաքացիների թիվը կկազմի մոտ 410 000-420000, միջին հետվճարի չափն էլ կլինի մոտ 3000-4000 դրամով ավելի, քան այսօր է։ Այդպիսով, հետվճարով կենսաթոշակները կմոտենան սպառողական զամբյուղի մոտ 90 տոկոսին, չնայած, որ այն բավարար չէ ամբողջական սպառողական զամբյուղին հասնելու համար։