Հայաստանում վերջին 5 տարում առաջին անգամ դատապարտյալների թիվը գերազանցել է կալանավորվածներին

Դատապարտյալների թիվը 24-ով ավելի է։

ՀՀ արդարադատության նախարար Սրբուհի Գալյանը հայտարարել է, որ Հայաստանում վերջին հինգ տարիների ընթացքում առաջին անգամ դատապարտյալների թիվը գերազանցել է կալանավորված անձանց թվին։

Նախարարի խոսքով՝ ներկայում դատապարտյալների թիվը 24-ով ավելի է, քան կալանավորվածների թիվը, ինչը նախադեպային ցուցանիշ է վերջին տարիների համար։ Մինչ այժմ, ըստ նրա, կալանավորվածների թիվը մշտապես գերազանցել է դատապարտյալներին։

Սրբուհի Գալյանը տվյալը ներկայացրել է դատական գործերի քննության ողջամիտ ժամկետների պահպանման խոչընդոտներին նվիրված քննարկման ընթացքում՝ ընդգծելով, որ այն դիտարկվում է որպես դատական և քրեակատարողական համակարգի դրական միտում։

Նրա գնահատմամբ՝ գործընթացների արագացման պայմաններում հնարավոր է, որ առաջիկայում այդ տարբերությունն ավելի մեծանա՝ հօգուտ դատապարտյալների, ինչը կվկայի կալանքի կիրառման համեմատաբար ավելի սահմանափակ և հիմնավորված օգտագործման մասին։