2029 թվականին Մեծ Բրիտանիայում կհայտնվի առաջին աերոտաքսին

Աերոտաքսին կօգտագործի Valo էլեկտրական ուղղաթիռը։

Vertical Aerospace ընկերությունը հայտարարել է, որ Մեծ Բրիտանիայի առաջին թռչող տաքսին կթողարկի 2029 թվականի սկզբին։

«Vertical Aerospace-ն այսօր հայտարարել է Մեծ Բրիտանիայում ավիատաքսիների առաջին երթուղիները [Լոնդոնի բիզնես թաղամաս] Քաների-Ուորֆի և խոշորագույն տրանսպորտային հանգույցների միջև գործարկելու ծրագրերի մասին»,— ասվում է ընկերության կայքում տեղադրված մամուլի հաղորդագրության մեջ։ Քաների-Ուորֆից հնարավոր կլինի հասնել Հիթրոու և Գաթվիք օդանավակայաններ, ինչպես նաև Քեմբրիջ և Օքսֆորդ քաղաքներ։ Նշվում է, որ նախագիծն իրականացվելու է Skyports Infrastructure և Bristow Group ընկերությունների հետ համատեղ կերպով։ Այն ենթադրում է ամբողջ տրանսպորտային ենթակառուցվածքի ստեղծում։

Աերոտաքսին կօգտագործի Valo էլեկտրական ուղղաթիռը, որը տեղավորում է չորս ուղևոր: Հայտարարվում է, որ այն կարող է թռչել ավելի քան 160 կմ՝ մոտավորապես 240 կմ/ժ արագությամբ: Vertical Aerospace-ը նախատեսում է մինչև 2030 թվականը արտադրել նման ուղղաթիռներից 175-ը: