Ներգաղթն ու կլիմայական քաղաքականությունը կործանում են Եվրոպան. Թրամփ

ՄԱԿ-ում կայացած իր ելույթում Թրամփը զգուշացրել է Եվրոպային, որ անվերահսկելի ներգաղթը և կլիմայական քաղաքականությունը կործանում են նրա ժառանգությունն ու հանգեցնում «աննախադեպ աղետի»։

«Ժամանակն է դադարեցնել բաց սահմանների ձախողված փորձը: Ձեր երկրները դժոխք են գլորվում»,- հայտարարել Է Թրամփը ՄԱԿ-ի Գլխավոր վեհաժողովի նիստում:

Դրանից առաջ նա թվարկել է ներգաղթի հակառակորդների համար սովորական փաստարկներն այն մասին, որ ներգաղթյալները՝ տարբեր մշակույթների և կրոնների մարդիկ, կործանում են ընդունող պետությունների մշակույթը, տնտեսությունը, օրենքն ու կարգը։ Թրամփը հայտարարել է, որ իր վարչակազմն արդեն իսկ դադարեցրել է զանգվածային անօրինական ներգաղթը Միացյալ Նահանգներ։

Թրամփը վստահեցրել է, որ համակրում է խնդրահարույց երկրներից փախստականներին։ «Բայց մենք պետք է խնդիրները լուծենք նրանց երկրներում, այլ ոչ թե ստեղծենք խնդիրներ մեզ մոտ»,- հայտարարել է ԱՄՆ նախագահը։

Երկրորդ պատճառը, թե ինչու է Եվրոպան «դժոխք գլորվում», ըստ Թրամփի, կլիմայի փոփոխության դեմ պայքարում «կանաչ էներգիային» անցնելու քաղաքականությունն է։

Թրամփը վերականգնվող էներգիան, մասնավորապես՝ հողմային էլեկտրակայանները, անվանել է անհեթեթություն և չափազանց թանկ ձեռնարկ, իսկ ՄԱԿ-ում վերջին քառասուն տարվա ընթացքում կլիմայի փոփոխության հետևանքների մասին արված ապոկալիպտիկ կանխատեսումները որակել է որպես «ամենամեծ խաբեություն»։

Իր գրեթե մեկ ժամ տևած ելույթի մեկ այլ հատվածում Թրամփը կոչ է արել դահլիճում հավաքված աշխարհի բոլոր երկրների առաջնորդներին պաշտպանել խոսքի և դավանանքի ազատությունը՝ ընդգծելով, որ քրիստոնեությունը նույնպես պաշտպանության կարիք ունի: Թրամփի խոսքով՝ այն ներկայումս աշխարհում ամենահալածվող կրոնն է։