Արձանագրվել են ապօրինի փայտանյութի ու սևահողի տեղափոխման, մթնոլորտային օդի աղտոտման դեպքեր

Արձանագրվել են ապօրինի փայտանյութի ու սևահողի տեղափոխման, մթնոլորտային օդի աղտոտման դեպքեր

Բնապահպանական իրավախախտումների կանխարգելման նպատակով հանրապետության ողջ տարածքում իրականացվող խստացված լայնածավալ ստուգայցերի ընթացքում Բնապահպանության և ընդերքի տեսչական մարմնի աշխատակիցներն արձանագրել են ապօրինի փայտանյութի, հողի բերրի շերտի տեղափոխման օդի աղտոտման դեպքեր։

Տեսչական մարմնից ներկայացրել են մանրամասներ։ Մասնավորապես՝

Արմավիրի մ․ Ոսկեհատ գյուղում Հ.Չ.-ն «Գազել» մակնիշի մեքենայով փորձել է ապօրինի տեղափոխել «Հաճարենի» տեսակի 3,7խմ շինափայտ, որը քողարկված է եղել փայտածուխով։

Գեղարքունիքի մ․ Երևան-Սևան-Իջևան ավտոճանապարհին Ա.Պ.-ն «Գազել» մակնիշի մեքենայով ապօրինի տեղափոխել է 5,35խմ փայտանյութ (շինափայտ)։

Նույն ավտոճանապարհին Գ.Մ.-ի վարած «ԿԱՄԱԶ» մակնիշի բեռնատարում հայտնաբերվել է 22խմ շինափայտ, որը քողարկված է եղել վառելափայտով։

Ապօրինի փայտանյութ տեղափոխող բոլոր բեռնատարները տեղափոխվել են ՆԳՆ ոստիկանության պահպանվող հատուկ տարածք։

Բոլոր դեպքերով հաղորդումներ կներկայացվեն ՀՀ քննչական կոմիտե։

Կոտայքի մ. Երևան-Սևան մայրուղում արձանագրվել է հողի բերրի շերտի ապօրինի տեղափոխման 4 դեպք․

Քաղաքացի Գ.Ա.-ի վարած «ԿԱՄԱԶ» մակնիշի բեռնատարի թափքում՝ 8խմ, Ն.Մ.-ի վարած «ԶԻԼ» մակնիշի բեռնատարում՝ 4խմ, Հ.Խ.-ի վարած «ԿԱՄԱԶ» մակնիշի բեռնատարում՝ 5խմ, Ն.Մ.-ի վարած «Իվեկո» մակնիշի բեռնատարում՝ 12խմ։

Իրավախախտները ենթարկվել են վարչական պատասխանատվության՝ յուրաքանչյուրը՝ 50.000-ական ՀՀ դրամի չափով։

Ապօրինի դուրս բերված սևահողը սահմանված կարգի համաձայն հանձնվել է համայնքներին։

Արմավիրի մարզում 9, Արագածոտնում 3 բեռնատարի վարորդ խախտել է մթնոլորտային օդի պահպանության կանոնները։

Առանց անթափանց ծածկոցի սորուն նյութեր տեղափոխող անձինք ենթարկվել են վարչական պատասխանատվության՝ 50.000-ական ՀՀ դրամի չափով։

Միջոցառումները շարունակվում են։