ՏԵՂԱԿԱՆ
Հայաստանում պաշտոնապես մեկնարկեց ստորագրությունների imID Sign առցանց հարթակը
Գործարկվել է imID Sign նորարարական հարթակը, որը նպատակ ունի ամբողջությամբ թվայնացնել և պարզեցնել փաստաթղթաշրջանառության ու ստորագրման գործընթացը։ Բիզնեսի և անհատների համար ստորագրումը դարձել է նույնքան հեշտ, որքան էլեկտրոնային նամակ ուղարկելը՝ ապահովելով իրավական ուժ ունեցող տարբերակներ աշխարհի ցանկացած կետից և սարքից։
Ինչո՞ւ են հայաստանյան բանկերը սահմանափակել կանխիկ ռուսական ռուբլու մուտքագրումը
ԵԱՏՄ տարածքում ռուսական արժույթի հսկայական ավելցուկի պատճառով հայաստանյան որոշ առևտրային բանկեր դադարեցրել կամ թանկացրել են կանխիկ ռուբլու մուտքագրումը հաշիվներին։ Իրավիճակի վրա ազդում է նաև ՌԴ նախագահի հրամանագիրը, որն արգելում է ԵԱՏՄ երկրներ $100 հազարը գերազանցող կանխիկի արտահանումը, ինչի պատճառով միջոցները դուրս են բերվում հենց ռուբլով։ Անկանխիկ հաշվարկները գործում են նույնությամբ։
Բջջային հեռախոսների օրինական շրջանառության համար կներդրվի IMEI համարների գրանցման համակարգ
Կառավարությունը նախատեսում է ստեղծել IMEI համարների հաշվառման միասնական շտեմարան, ինչը կնվազեցնի ապօրինի ներմուծումը և կպաշտպանի սպառողներին կեղծված սարքերից։ Կարգավորումը չի առնչվում քաղաքացիների անձնական տվյալների հավաքագրմանը. շտեմարանում պահպանվելու է միայն սարքի 15-նիշանոց կոդը։
Ինքնակամ կառույցների օրինականացման համար կսահմանվի վերջնաժամկետ և նոր տուրքեր
Ինքնակամ կառույցների օրինականացման վերջնաժամկետ է սահմանվելու մինչև 2027 թվականի դեկտեմբերի 30-ը։ Երևանում և հարակից համայնքներում օրինականացման համար կգանձվի ձևակերպման վճարի եռապատիկը և 100 մլն դրամ միանվագ տեղական տուրք, իսկ մարզերում և Երևանին ոչ հարակից համայնքներում տուրքի չափը կկազմի 50 մլն դրամ։
ԿԳՄՍՆ-ն և ԿԲ-ն քննարկել են դպրոցներում ֆինանսական կրթության ծրագրի ընդլայնումը
Նախարար Ժաննա Անդրեասյանը ԿԲ ներկայացուցիչների և միջազգային փորձագետ Լեոնոր Ռիիթսալուի հետ քննարկել է «Ֆինանսական կրթությունը դպրոցում» ծրագրի 2-րդ փուլը։ Կարևորվել է գրագետ ֆինանսական սովորույթների ձևավորումը դպրոցական տարիքում, ինչպես նաև ծրագրերի իրականացումը նոր հիմնվող երիտասարդական կենտրոններում (ոչ ֆորմալ կրթության ձևաչափով)։
ՄԻՋԱԶԳԱՅԻՆ
Վառելիքային ճգնաժամ Ռուսաստանում. բենզինի գինը հասել է 140 ռուբլու
Ռուսաստանի վառելիքի ներքին շուկայում մեծածախ առաջարկի կրկնակի կրճատման պատճառով սկսվել է լոգիստիկ կոլապս։ Ավտոլիցքավորման կայաններում լիտրի գինը թռիչք է ապրել՝ հասնելով 120-140 ռուբլու։ Reuters-ի փոխանցմամբ՝ մատակարարները կանոնավոր կերպով խախտում են բեռնման ժամկետները՝ ուշացումները հասցնելով 1-2 ամսվա։
Դոնալդ Թրամփի եկամուտը թվային ակտիվներից 2025 թվականին գերազանցել է $500 միլիոնը
Թեև ԱՄՆ նախագահ Դոնալդ Թրամփը քարոզարշավի ժամանակ խոստացել էր երկիրը դարձնել համաշխարհային կրիպտո-մայրաքաղաք, էթիկայի փորձագետները մտահոգված են շահերի բախմամբ։ Պետության ղեկավարի անձնական հարստացումն այնպիսի ակտիվների հաշվին, որոնց կարգավորումը կախված է Սպիտակ տան և SEC-ի որոշումներից, աննախադեպ է ԱՄՆ պատմության մեջ։
Ֆուտբոլի աշխարհի առաջնության հյուրընկալող քաղաքներում սպառողական ծախսերն աճել են 6.3%-ով
Հյուսիսային Ամերիկայում ընթացող Մունդիալի խմբային փուլի մեկնարկը բարձր տնտեսական ակտիվություն է ապահովել։ Ծախսերի աճը հիմնականում պայմանավորված է օտարերկրյա զբոսաշրջիկներով, որոնց կողմից վաճառքի կետերում կատարված գործարքների քանակը նախորդ տարվա համեմատ ավելացել է 16.7%-ով։
Հուլիսի 1-ից ուժի մեջ է մտել ԵՄ-ԱՄՆ նոր առևտրային համաձայնագիրը
Նոր համաձայնագրով Եվրամիությունը չեղարկում է ամերիկյան արդյունաբերական ապրանքների մաքսատուրքերը, մինչդեռ եվրոպական ապրանքների նկատմամբ ԱՄՆ-ում կգործի 15% մաքսատուրք։ Բացի այդ, ԵՄ-ն պարտավորվում է մինչև 2028 թվականը Միացյալ Նահանգներից գնել ընդհանուր 750 միլիարդ դոլարի էներգառեսուրսներ։
