Օգոստոսի 14-ի բիզնես լուրերը

օրվա տեղական եւ միջազգային տնտեսական գլխավոր լուրերը

Կառավարությունը ՀՀ ԱԳՆ-ին 40 մլն դրամ կտրամադրի արարողակարգային միջոցառումների համար

ՀՀ կառավարությունը 2025 թվականի երկրորդ կիսամյակում 40 մլն դրամ կտրամադրի ԱԳՆ-ին՝ օտարերկրյա արարողակարգային միջոցառումների կազմակերպման համար։ Գումարը նախատեսված է գիշերավարձի, պատվիրակության ներկայացուցչական և փոխադրամիջոցների վարձակալման ծախսերի համար։

ՀՀ քաղաքացիները կկարողանան այցելել Օման առանց մուտքի արտոնագրի
Օմանի կառավարությունը որոշել է 2025 թվականի օգոստոսի 11-ից ազատել ՀՀ քաղաքացիներին մուտքի արտոնագրի պահանջից։ Այս քայլը փոխադարձ է՝ արձագանք Հայաստանի որոշմանը Օմանի քաղաքացիների համար վերացնել մուտքի արտոնագրի պահանջը։ Նախաձեռնությունը նպատակ ունի խթանել զբոսաշրջությունը և միջմարդկային կապերը։

Դպրոցներին լրացուցիչ ֆինանսավորում կտրամադրվի
Մինչև 10 մլն դրամ լրացուցիչ ֆինանսավորում կտրամադրվի այն դպրոցներին, որոնք ցուցաբերել են բարձր կատարողական։ Նպատակն է խրախուսել լավագույն արդյունքներ գրանցած հաստատություններին և աջակցել ցածր կատարողական ունեցողներին։ Ամեն տարի առավելագույնը 50 դպրոց կարող է օգտվել այս ծրագրից։

Սահմանվել է խաղային գործունեության կարգավորման օպերատորի ընտրության մրցույթի ընթացակարգը
Կառավարությունը հաստատել է խաղային գործունեության կարգավորման օպերատորի ընտրության նոր կարգը։ Օպերատորը կընտրվի մրցույթով՝ 15 տարի ժամկետով։ ՊԵԿ-ը ակնկալում է, որ համակարգը թույլ կտա վերահսկել խաղերի ֆինանսական հոսքերը և հարկային եկամուտների ավելացում կապահովի՝ 2026 թվականից շահումները հարկելու պայմաններում։

Ռուսները հունիսի սկզբից բանկերից ավելի քան 500 միլիարդ ռուբլի են կանխիկացրել
Ռուսաստանում հունիսի սկզբից բանկերից դուրս է բերվել ավելի քան 500 մլրդ ռուբլի։ Միայն անցյալ շաբաթ կանխիկացվել է 121 մլրդ ռուբլի։ Կենտրոնական բանկը դա կապում է բջջային ինտերնետի խափանումների հետ։

Մեծ Բրիտանիայի ՀՆԱ-ն երկրորդ եռամսյակում աճել է սպասվածից ավելի բարձր տեմպերով
2025 թվականի երկրորդ եռամսյակում Մեծ Բրիտանիայի ՀՆԱ-ն աճել է 0.3%-ով՝ համեմատած նախորդ եռամսյակի։ Ծառայությունների ոլորտում արձանագրվել է 0.4%, շինարարությունում՝ 1.2% աճ, իսկ արտադրության ոլորտում 0.3% անկում։ Արտահանումն աճել է 1.6%, ներմուծումը՝ 1.4%։

Թուրքական լիրան ռեկորդային անկում է գրանցել
Թուրքական լիրայի փոխարժեքը հասել է նոր պատմական նվազագույնի։ Շաբաթվա ընթացքում այն արժեզրկվել է 0.15%, իսկ տարեկան կտրվածքով՝ ավելի քան 21%։ 2025 թվականի առաջին կեսին լիրան դարձել է աշխարհի ամենաթույլ արժույթներից մեկը։

Արաբիկա սուրճը թանկանում է
Բրազիլիայի սուրճի արտահանումը 2025 թվականի հուլիսին նվազել է 20.4%-ով՝ նախորդ տարվա համեմատ։ ԱՄՆ-ում սուրճ ներկրողները դիմել են բրազիլական մատակարարներին մատակարարումների հետաձգման խնդրանքով՝ օգոստոսի 1-ից 50% ներմուծման մաքսատուրք մտցնելու պատճառով։