Օգոստոսի 13-ի բիզնես լուրերը

Տեղական նորություններ

Հայաստանն և Ադրբեջանը ԱՄՆ-ի հետ ստորագրել են տնտեսական համաձայնագրեր, որոնք, ԱՄՆ Պետդեպարտամենտի գնահատմամբ, նոր հնարավորություններ են ստեղծում ամերիկյան բիզնեսի համար։ Համաձայնագրերը բացահայտում են Հարավային Կովկասի զգալի ներուժը առևտրի, տարանցման, էներգետիկայի, ենթակառուցվածքների և տեխնոլոգիաների ոլորտներում։

Օգոստոսի 12-ին մեկ օրում Ռուսաստանի Դաշնություն է մուտք գործել շշալցված կոնյակով բեռնված 26 բեռնատար։ Տվյալը հայտնել է էկոնոմիկայի նախարար Գևորգ Պապոյանը՝ ընդգծելով, որ սա տարվա լավագույն ցուցանիշն է մեկ օրվա ընթացքում։

Վիճակագրական կոմիտեի տվյալներով՝ 2025 թվականի հուլիսին, 2024 թվականի հուլիսի համեմատ, Հայաստանում արձանագրվել է 3,4% 12-ամսյա գնաճ։ Նույն ժամանակահատվածում սննդամթերքի և ոչ ալկոհոլային խմիչքների գները աճել են 4,7%-ով, իսկ ամսական կտրվածքով նվազել են 2,7%-ով։

Ռուսաստանը մեծացրել է Հայաստան մատակարարվող գյուղատնտեսական արտադրանքի ծավալները։ 2025 թվականի հունվար-մայիսին մատակարարված հիմնական ապրանքներն են եղել ցորենը, շոկոլադը և ալրային հրուշակեղենը։ Ընդհանուր առմամբ ԵԱՏՄ երկրներին Ռուսաստանը մատակարարել է մոտ 4,6 միլիոն տոննա գյուղմթերք՝ 3,2 միլիարդ ԱՄՆ դոլար արժողությամբ։

Միջազգային նորություններ

ԱՄՆ-ի պետական պարտքը հասել է պատմական 37 տրիլիոն դոլարի։ Կոնգրեսի համատեղ տնտեսական կոմիտեն կանխատեսում է, որ ներկայիս աճի տեմպերով 2026 թվականի փետրվարին պարտքը կավելանա ևս 1 տրիլիոն դոլարով։ Միևնույն ժամանակ, հուլիսին դաշնային բյուջեի դեֆիցիտը կազմել է 291,143 միլիարդ դոլար, ինչը 19,4%-ով գերազանցում է նախորդ տարվա նույն ցուցանիշը։

Եվրոպական երկրները 2022 թվականի փետրվարից մինչև 2025 թվականի հունիս տրամադրել են 35,1 միլիարդ եվրո ռազմական օգնություն Ուկրաինային։ Սա 4,4 միլիարդ-ով ավելի է, քան ԱՄՆ-ի համանման ծախսերը։ Մայիս-հունիս ամիսներին տրամադրված 10,5 միլիարդ եվրոյի առնվազն 4,6 միլիարդը ուղղվել է պաշտպանական ձեռնարկությունների հետ պայմանագրերին։

Tesla Energy Ventures ընկերությունը դիմում է ներկայացրել Մեծ Բրիտանիայում էլեկտրաէներգիայի մատակարարման արտոնագիր ստանալու համար։ Եթե այն հաստատվի, ընկերությունը 2026 թվականին կսկսի էլեկտրաէներգիա մատակարարել բնակչությանը և բիզնեսին։ Tesla Electric-ն արդեն գործում է Տեխասում։

Գերմանիայում ընթացիկ տարվա առաջին կիսամյակում գարեջրի վաճառքները նվազել են 6,3%-ով՝ հասնելով 3,9 միլիարդ լիտրի, ինչը պատմական նվազագույնն է 1993 թվականից ի վեր։ ԵՄ երկրներ մատակարարումները նվազել են 5%-ով՝ կազմելով 406,9 միլիոն լիտր։

Հետաքրքիր

2025 թվականի հունիսին Հայաստանում գրանցվել է 2,048 անհատ ձեռնարկատեր, 747 սահմանափակ պատասխանատվությամբ ընկերություն, 40 հասարակական կազմակերպություն և 10 փակ բաժնետիրական ընկերություն։