Հռիփսիմե Հունանյանը հրաժարական է տալիս առողջապահության հարցերի մշտական հանձնաժողովի նախագահի պաշտոնից

Հռիփսիմե Հունանյանն ԱԺ առողջապահության հարցերի մշտական հանձնաժողովի նախագահ էր ընտրվել 2025-ի հոկտեմբերին:

Հռիփսիմե Հունանյանը ներողություն է խնդրել Ազգային ժողովում իր հնչեցրած որոշ ձևակերպումների համար և հայտարարել, որ հրաժարականի դիմում է ներկայացնում ԱԺ առողջապահության հարցերի մշտական հանձնաժողովի նախագահի պաշտոնից, ինչպես նաև ինքնաբացարկ է հայտնում առաջիկա խորհրդարանական ընտրություններում «Քաղաքացիական պայմանագիր» կուսակցության համամասնական ցուցակում ընդգրկվելուց։

«Սիրելի՛ հայրենակիցներ,

Վերջին շրջանում Ազգային ժողովում հնչեցրած իմ որոշ մտքեր արժանացել են մեր մի շարք քաղաքացիների քննադատությանը։

Նախևառաջ ցանկանում եմ ներողություն խնդրել այն ձևակերպումների համար, որոնք այս կամ այն կերպ առաջացրել են մեր սիրելի քաղաքացիների զայրույթն ու դժգոհությունը։ Հանրային խոսքը քաղաքական գործունեության անբաժանելի մասն է, և երբեմն բանավոր ելույթների ընթացքում հնարավոր չէ խուսափել վրիպումներից։

Սխալվել կարող են բոլորը, սակայն սխալների հետ առերեսվելն ու դրանք ուղղելը պարտավոր են անել առաջին հերթին հանրային առաջնորդություն ստանձնած մարդիկ՝ օրինակ ծառայելով հասարակությանը։ Լավագույն առաջնորդությունը սեփական օրինակով առաջնորդությունն է։ Կարծում եմ՝ սա պետք է դառնա մեր քաղաքական դաշտի կարևորագույն արժեքային ուղենիշներից մեկը։

Առաջնորդվելով հենց այս սկզբունքով՝ որոշում եմ կայացրել հրաժարականի դիմում ներկայացնել Ազգային ժողովի առողջապահության հարցերի մշտական հանձնաժողովի նախագահի պաշտոնից։

Միաժամանակ որոշել եմ ինքնաբացարկ հայտնել առաջիկա խորհրդարանական ընտրություններում «Քաղաքացիական պայմանագիր» կուսակցության համամասնական ցուցակում ընդգրկվելուց։

Շարունակելու եմ ծառայել մեր պետությանը և ժողովրդին՝ Հայաստանի Հանրապետության հզորացման կարևորագույն առաքելության ճանապարհին»։

Հիշեցնենք՝ Հռիփսիմե Հունանյանն ԱԺ առողջապահության հարցերի մշտական հանձնաժողովի նախագահ էր ընտրվել 2025-ի հոկտեմբերին: