Ինչպես առանց բնակարանը վաճառելու եկամուտ ստանալ․ նոր կարգավորում՝ թոշակառուների համար

Այս մեխանիզմի կիրառմամբ գույքի սեփականատերը կարող է բանկի հետ պայմանագիր կնքել։

ՀՀ կառավարությունը ապրիլի 2-ի նիստում հավանություն է տվել երկու օրենսդրական նախաձեռնության՝ հետադարձ հիփոթեքի և ամուսնու բացառիկ սեփականության ինստիտուտների ներդրման վերաբերյալ։

Կադաստրի կոմիտեի ղեկավար Սուրեն Թովմասյանի ներկայացմամբ՝ հետադարձ հիփոթեքը հնարավորություն կտա թոշակառուներին իրենց անշարժ գույքի դիմաց ստանալ լրացուցիչ եկամուտ՝ առանց այն վաճառելու և բնակության իրավունքը կորցնելու։

Այս մեխանիզմի կիրառմամբ գույքի սեփականատերը կարող է բանկի հետ պայմանագիր կնքել՝ պահպանելով սեփականության իրավունքը և բնակվելու հնարավորությունը, իսկ բանկը կվճարի ամսական գումարներ։

Մեխանիզմը նախատեսում է, որ գույքը վերջնականապես փոխանցվում է բանկին միայն սեփականատերերի մահից հետո, իսկ ժառանգները կարող են այն հետգնել սահմանված պայմաններով։

Երկրորդ նախաձեռնությունը վերաբերում է ամուսնու բացառիկ սեփականության ինստիտուտին։ Այն հնարավորություն կտա, որ ամուսինները ընտրեն սեփականության այնպիսի ձև, որի դեպքում մեկ ամուսնու մահից հետո գույքը ամբողջությամբ կմնա կենդանի մնացած ամուսնուն՝ առանց համասեփականության ձևավորման ժառանգների հետ։

Ժառանգության իրավունքը կգործի միայն երկրորդ ամուսնու մահից հետո։

Կարգավորումները նպատակ ունեն ապահովել թոշակառուների ֆինանսական հնարավորությունների ընդլայնումը և պարզեցնել գույքային հարաբերությունները ընտանիքում։