Ինչպես պարզել՝ վերելակն անվտա՞նգ է, թե՞ ոչ․ սահմանվել են նոր կանոններ

Մինչ այժմ Հայաստանում չի գործել միասնական նորմատիվ իրավական ակտ

Կառավարությունը մարտի 26-ի նիստում հաստատել է վերելակների անվտանգ շահագործման տեխնիկական անվտանգության նորմերը, կանոնները և հրահանգները։

Որոշման հիմնավորման մեջ նշվում է, որ հանրային նշանակության շենքերում տեղադրված վերելակները համարվում են արտադրական վտանգավոր օբյեկտներ։ Դրանք ներառում են բազմաբնակարանային շենքերը, արտադրական շինությունները և այլ ընդհանուր օգտագործման վայրերը՝ բացառությամբ մինչև 250 կգ բեռնատարողությամբ վերելակների։

Նոր կարգավորմամբ նախատեսվում է, որ նման վերելակները պետք է ենթարկվեն տեխնիկական անվտանգության փորձաքննության՝ առնվազն տարեկան մեկ անգամ։

Մինչ այժմ Հայաստանում չի գործել միասնական նորմատիվ իրավական ակտ, որը կկարգավորեր ինչպես վերելակների տեխնիկական փորձաքննությունը, այնպես էլ դրանց անվտանգ շահագործումը։

Նոր ընդունված կանոնակարգը նպատակ ունի լրացնել այս բացը և սահմանել հստակ պահանջներ՝ բարձրացնելու վերելակների շահագործման անվտանգության մակարդակը։