Վստահություն ձևավորող ինֆլյուենսերային համագործակցություններ․ կարևոր պայմաններն ու խանգարող գործոնները

Հաջողություն կարող է ապահովել միայն այն մոտեցումը, որը չի գերադասում ձևը բովանդակությունից, թվերը՝ մարդկանցից, ցուցադրականությունը՝ անկեղծ շփումից։

Ինֆլյուենսերների միջոցով մարքեթինգը այսօր արդեն հասել է մոտ 24 միլիարդ դոլարի ծավալի։ Բայց շուկայավարման ղեկավարները կանգնած են մի հակասության առաջ․ ոլորտը արագ զարգանում է, իսկ վստահությունը՝ նվազում։ Հետազոտությունները ցույց են տալիս, որ թեև սպառողների մեծ մասը կարևորում է բնականությունն ու անկեղծությունը, նրանց գրեթե կեսը համոզված է, որ ինֆլյուենսերների մեծ մասը անկեղծ չէ։ Ավելի քան մեկ երրորդն էլ կարծում է, որ ինֆլյուենսերները հաճախ սխալ կերպով են ներկայացնում թե՛ իրենց, թե՛ գովազդվող ապրանքը։

Այս ամենի հետևանքով ձևավորվում է խաթարված միջավայր․

• սպառողները զգում են, որ իրենց մոլորեցնում են,

• ինֆլյուենսերները դժվարանում են մնալ ինքն իրենց,

• բրենդներն էլ միշտ ճիշտ չեն հասկանում սոցիալական տարածքում վստահելի հարաբերություններ կառուցելու սկզբունքները։

Ինչն է ձևավորում վստահելի և ընդունելի ինֆլյուենսերին

Համաշխարհային մեդիա ոլորտում մասնագետների, բրենդների, գործակալությունների, ինֆլյուենսերների և հետևորդների հետ մեծ թվով զրույցները ցույց են տալիս, որ վստահելի լինելը կախված է նրանից, թե որքան ներդաշնակ են հետևյալ հինգ հատկանիշները․

1. Մասնագիտացում

Ինֆլյուենսերը ընկալվում է որպես իր ոլորտին տեղյակ, հետևողական և վստահելի մարդ։

2. Կապ և մտերմություն լսարանի հետ

Հետևորդները զգում են, որ ինֆլյուենսերը ոչ միայն հրապարակում է, այլ շփվում, արձագանքում և ստեղծում համայնք։

3. Արժեհամակարգի կայունություն

Ինֆլյուենսերը չի ընդունում առաջարկներ, որոնք հակասում են իր սկզբունքներին, և գործում է այնպես, որ չվնասի իր լսարանի վստահությանը։

4. Ստեղծագործական ինքնատիպություն

Բովանդակությունն ունի սեփական ձեռագիր, բնական պատմողականություն, ոչ թե ամբողջությամբ թելադրված է բրենդի կողմից։

5. Բաց և հստակ հաղորդակցում

Ինֆլյուենսերը պարզ նշում է, երբ համագործակցությունը վճարովի է, ներկայացնում է իր իրական փորձը՝ չթաքցնելով թերությունները։

Բոլոր կողմերի համար կարևորագույնը տարբեր է․

• Սպառողներն առաջնահերթ են համարում ազնվությունն ու պարզ լինելը։

• Ինֆլյուենսերները կարևորում են ստեղծագործական ազատությունը և աշխատանքը՝ իրենց հետաքրքրող ոլորտում։

• Բրենդները հաճախ ավելի մեծ ուշադրություն են դարձնում ծավալներին ու արագ արդյունքին՝ երբեմն անտեսելով մարդկային կապի ուժը։

Երբ այս պատկերացումները միաժամանակ չեն համընկնում, առաջանում են խնդիրներ․ բովանդակությունը դառնում է չափազանց ձևական, ինֆլյուենսերը՝ հեռացած իր իրական ձայնից, բրենդը՝ ընկալման կորուստ ունեցող։

Այս ոլորտում ներդրումները շարունակաբար աճում են․ միայն 2020-ից սկսած ծավալը երեք անգամ մեծացել է։ Սակայն հաջողություն կարող է ապահովել միայն այն մոտեցումը, որը չի գերադասում ձևը բովանդակությունից, թվերը՝ մարդկանցից, ցուցադրականությունը՝ անկեղծ շփումից։