Քանի՞ տարանցիկ չվերթ է իրականացվել ՀՀ օդային տարածքով Իրան-Իսրայել պատերազմով պայմանավորված

Մերձավոր Արևելքում Իրան-Իսրայել հակամարտությամբ պայմանավորված օդային տարածքների փակումը հանգեցրել է Հայաստանի օդային տարածքով տարանցիկ թռիչքների աճի։

ՀՀ քաղաքացիական ավիացիայի կոմիտեի տվյալներով՝ փետրվարի 28-ից մինչև մարտի 23-ն ընկած ժամանակահատվածում Հայաստանի օդային տարածքով իրականացվել է 6414 տարանցիկ թռիչք, ինչը 129-ով ավելի է 2025 թվականի նույն ժամանակահատվածի համեմատ։

Թռիչքների աճը պայմանավորված է մի շարք երկրների օդային տարածքների ամբողջական կամ մասնակի փակմամբ, ինչը վերաուղղել է ավիացիոն հոսքերը դեպի այլ միջանցքներ, այդ թվում՝ Հայաստանի օդային տարածք։

Միաժամանակ, մարտի երկրորդ տասնօրյակից նկատվել է թռիչքների քանակի որոշակի նվազում, ինչը կարող է կապված լինել երթուղիների վերադասավորման և այլընտրանքային ուղիների օգտագործման հետ։

Կոմիտեից նշել են, որ թռիչքների մայրուղիների ընտրությունը գտնվում է բացառապես ավիաընկերությունների իրավասության ներքո։ Չնայած հոսքերի աճին՝ աերոնավիգացիոն սպասարկման հետ կապված խնդիրներ չեն արձանագրվել, և գերծանրաբեռնվածության պատճառով սահմանափակումներ չեն կիրառվել։

Տարածաշրջանում օդային տարածքի սահմանափակումները շարունակվում են, ինչը պահպանում է Հայաստանի օդային միջանցքի կիրառման գործնական նշանակությունը միջազգային ավիացիայում։