Հովհաննես Այվազովսկու հռչակավոր «Իններորդ ալիք» կտավն առաջին անգամ կուղարկվի համալիր գիտական վերականգնման։ Այս մասին հայտնել է Ռուսական թանգարանի մամուլի ծառայությունը։ Այս առիթով մայիսի 26-ին թանգարանի Բենուայի մասնաշենքում տեղի է ունենում վերականգնողական խորհրդի նիստը։
Մինչ այժմ կտավի նկատմամբ իրականացվել են միայն տեղային կոնսերվացման աշխատանքներ՝ ներկաշերտի ամրացում, թեթև երանգավորում և կանխարգելիչ միջոցառումներ։ Սակայն մասնագետների բազմամյա դիտարկումները ցույց են տվել, որ հիմնաներկի և ներկաշերտի վիճակն աստիճանաբար վատթարանում է. ընդլայնվում են ճաքերի գոտիները, ի հայտ են գալիս նոր կոտրվածքներ ու գեղանկարի տեղային շերտազատումներ։
Բաց վերականգնում և ցուցահանդեսի նախապատրաստում Գլուխգործոցի ամբողջական վերականգնման որոշումն ընդունվել է Այվազովսկու մեծածավալ ցուցահանդեսին ընդառաջ, որը կբացվի 2026 թվականի հոկտեմբերին։
Կտավը Միխայլովյան պալատի №14 Ակադեմիական սրահից արդեն տեղափոխվել է Բենուայի մասնաշենքի Բաց վերականգնման սրահ: Սա հնարավորություն կտա թանգարանի այցելուներին անձամբ հետևել մասնագետների աշխատանքի ընթացքին։
Վերականգնողների առջև դրված են հետևյալ հիմնական խնդիրները.
Ամրացնել ներկաշերտն ու կտավի ամբողջ մակերեսով հիմնաներկը,
Վերացնել շերտազատված օջախները,
Մշակել ժամանակի ընթացքում անհամասեռ դարձած և բծերով պատված լաքապատ շերտը:
Աշխատանքների ավարտից հետո կտավը կցուցադրվի հեղինակի նախնական մտահղացմանը առավելագույնս մոտ գունային երանգավորմամբ:
Պատմական շրջանակի վերականգնումը 1850 թվականին ստեղծված կտավը Ռուսական թանգարանի հավաքածուին է հանձնվել 1897 թվականին՝ իր պատմական ոսկեզօծ շրջանակի հետ միասին։ Շրջանակի գիտական վերականգնումն իրականացվելու է կտավի աշխատանքներին զուգահեռ։
Թանգարանի փոխանցմամբ՝ արդեն իսկ վերականգնվել է փորագրության ավելի քան 100 կորսված հատված: Բոլոր տարրերը, պահպանված օրինակների հիման վրա, նորից տաշվում են լորենու փայտից, պատվում ավանդական հիմնաներկով և հետագայում կպատվեն թերթավոր ոսկով։
