Հորմուզի նեղուցում լարվածությունը հարվածել է միջազգային առևտրային ուղիներին․ Չինաստանի ԱԳՆ

Չինաստանը կոչ է անում բոլոր կողմերին անհապաղ դադարեցնել ռազմական գործողությունները։

Հորմուզի նեղուցում ստեղծված լարվածությունը հարվածել է ապրանքների և էներգակիրների փոխադրման միջազգային առևտրային ուղիներին։ Այս մասին երկուշաբթի օրը կայացած ճեպազրույցի ժամանակ հայտարարել է Չինաստանի ԱԳՆ պաշտոնական ներկայացուցիչ Լին Ցզյանը, հաղորդում է China Daily-ն։

«Հորմուզի նեղուցում և դրան հարող ջրատարածքում տիրող լարվածությունը հարվածել է ապրանքների և էներգակիրների փոխադրման միջազգային առևտրային ուղիներին, ինչպես նաև խաթարել է տարածաշրջանում և ամբողջ աշխարհում տիրող խաղաղությունն ու կայունությունը», – նշել է Լին Ցզյանը։

Նրա խոսքով՝ Չինաստանը կոչ է անում բոլոր կողմերին անհապաղ դադարեցնել ռազմական գործողությունները, խուսափել լարվածության հետագա էսկալացիայից և թույլ չտալ, որ տարածաշրջանային անկայունությունը բացասաբար ազդի համաշխարհային տնտեսական զարգացման վրա։

Իրանի շուրջ հակամարտության սրման ֆոնին գրեթե դադարեցվել է Հորմուզի նեղուցով նավագնացությունը, որը Պարսից ծոցի երկրներից նավթի և հեղուկացված բնական գազի համաշխարհային շուկա մատակարարման հիմնական երթուղին է։

Միևնույն ժամանակ, անվտանգության ռիսկերի աճի պատճառով ապահովագրական ընկերությունները սկսել են բարձրացնել սակագները և վերանայել ապահովագրական ծածկույթի պայմանները, ինչը լրացուցիչ ճնշում է գործադրում էներգակիրների միջազգային առևտրի վրա։