Հորմուզի նեղուցի խափանումը կարող է բարձրացնել սննդամթերքի գները աշխարհում

Էներգետիկ շուկաներն անմիջապես արձագանքել են նեղուցով տարանցման սահմանափակումներին։

ՄԱԿ-ի առևտրի և զարգացման խորհրդաժողովի (UNCTAD) փորձագետները մտահոգություն են հայտնում, որ Հորմուզի նեղուցում նավագնացության խափանումը կարող է հանգեցնել սննդամթերքի գների աճի։ Այս մասին նշվում է կազմակերպության կայքում մարտի 10-ին հրապարակված հաշվետվությունում։

Փորձագետների գնահատմամբ՝ էներգակիրների, պարարտանյութերի և տրանսպորտային ծառայությունների թանկացումը, այդ թվում՝ ծովային փոխադրումների, նավի վառելիքի և ապահովագրության արժեքի աճը, կարող է սննդամթերքի գնի բարձրացման և տնային տնտեսությունների բյուջեների վրա ճնշման ուժեղացման պատճառ դառնալ, հատկապես առավել խոցելի խմբերի համար։

UNCTAD-ը նշում է, որ էներգետիկ շուկաներն անմիջապես արձագանքել են նեղուցով տարանցման սահմանափակումներին։ 1990 թվականի հունվարից մինչև 2026 թվականի փետրվարը գրանցված էներգետիկ ճգնաժամերի վերլուծությունը ցույց է տալիս, որ նավթի գնի աճն ուղղակիորեն ազդում է սննդամթերքի գնի բարձրացման վրա։

Հիշեցնենք, որ մարտի 2-ին Իրանի Իսլամական հեղափոխության պահապանների կորպուսի ներկայացուցիչը նախազգուշացրել էր Հորմուզի նեղուցի հնարավոր փակման մասին։ Մարտի 5-ին Իրանի արտաքին գործերի նախարարությունը հայտարարել էր, որ նեղուցը պաշտոնապես փակ չէ, սակայն մի շարք նավեր խուսափում են այն հատելուց՝ անվտանգության նկատառումներից ելնելով։