Հետվճար ստացող կենսաթոշակառուների թիվն ավելացել է. կառավարությունը լրացուցիչ գումարներ հատկացրեց

Կենսաթոշակառուներին հետվճար տրամադրելու համար ՀՀ 2025–ի պետական բյուջեով նախատեսվել է 12,432.0 մլն դրամ:

Կառավարությունն իր այսօրվա՝ սեպտեմբերի 25–ի նիստում որոշեց 3,2 մլն դրամ հատկացնել անկանխիկ եղանակով վճարումներից կենսաթոշակառուներին հետվճար տրամադրելու միջոցառման շարունակականությունը 2025–ի հոկտեմբեր-դեկտեմբեր ամիսներին ապահովելու համար։

Հիմնավորման մեջ նշվում է, որ միջոցառման իրականացման ժամկետ է սահմանվել մինչև 2025 թվականի դեկտեմբերի  31-ը:

Միջոցառման շրջանակում տվյալ ամսում վճարման ենթակա հետվճարը հաշվարկվում է այդ ամսվան նախորդող ամսում կատարած անկանխիկ գնումների և վճարումների գործարքների 12%-ի չափով, բայց ոչ ավելի, քան 6000 դրամը: Հետվճարը վճարվում է յուրաքանչյուր ամիս՝ մինչև տվյալ ամսվա 25-ը։

Կենսաթոշակառուներին հետվճար տրամադրելու համար ՀՀ 2025–ի պետական բյուջեով նախատեսվել է 12,432.0 մլն դրամ, շահառուների թիվը՝ 280,000։ 2025 թվականի հունվար-օգոստոս ամիսներին ծախսվել է տարեկան գումարի 78.9%-ը կամ 10,340.4 մլն դրամը, իսկ շահառուների միջին ամսական թիվը կազմել է 314,845։

2025 թվականի փետրվար-օգոստոս ամիսների միջոցառման շահառուների թվի ամսական աճը կազմել է 2.9 %, իսկ 1 շահառուի հաշվով հետվճարի գումարի փետրվար- օգոստոս ամիսների միջին ամսական աճը՝ 1.3 %։

Այս միտումները պահպանվելու դեպքում 13,152.0 մլն դրամը բավարար չէ հետվճարի գծով տարեկան ծախսերը հոկտեմբեր ամսից սկսած կատարելու համար։

Հետեւաբար, անհրաժեշտություն է առաջացել պետական բյուջեից հատկացնել լրացուցիչ միջոցներ։