Hermès-ը հրաժարվել է Քիմ Քարդաշյանի դստերը վաճառել հազվագյուտ պայուսակ

Քիմ Քարդաշյանը Hermès պայուսակների մեծ հավաքածուի սեփականատեր է։

Ֆրանսիական Hermès նորաձևության տունը հրաժարվել է Քիմ Քարդաշյանի և Քանյե Ուեսթի դստերը՝ Նորթ Ուեսթին, վաճառել հազվագյուտ Black Mini Kelly պայուսակ։ Այս մասին հայտնում է լրագրող Էմի Օդելը իր «Back Row» տեղեկագրում։

Ըստ հրապարակման՝ պատմությունը ներկայացրել է Բևեռլի Հիլզի Hermès խանութի նախկին աշխատակիցը՝ «Retail Confessions» շարքի շրջանակում։ Նրա խոսքով՝ Քիմ Քարդաշյանը և Քանյե Ուեսթը փորձել են իրենց ավագ դստեր համար ձեռք բերել սև Mini Kelly պայուսակ, հնարավոր է՝ ալիգատորի կաշվից պատրաստված տարբերակը։

«Ոչ բոլոր հայտնիներն են ստանում այն, ինչ ուզում են»,- նշել է նախկին աշխատակիցը՝ հավելելով, որ նման դեպքերում խնդրանքը սովորաբար հասնում է կորպորատիվ մակարդակի, քանի որ հանրային դեմքերի գնումները լայնորեն լուսաբանվում են։

Սակայն, ըստ աղբյուրի, այս անգամ ապրանքանիշը մերժել է վաճառքը։ Խանութի աշխատակիցներն անգամ զարմացել են որոշումից։ Ղեկավարությունը չի ցանկացել, որպեսզի Նորթ Ուեսթը հանրային միջոցառումների ժամանակ ներկայանա ալիգատորի կաշվից Mini Kelly-ով։

Mini Kelly-ն Hermès-ի ամենահազվագյուտ մոդելներից է։ Երկրորդային շուկայում Alligator Mini Kelly-ի արժեքը կարող է գերազանցել 75,000 դոլարը։

Միևնույն ժամանակ, նշվում է, որ Նորթ Ուեսթը արդեն ունի շքեղ զգեստապահարան։ Քիմ Քարդաշյանը Hermès պայուսակների մեծ հավաքածուի սեփականատեր է, որոնց թվում են Mini Kelly-ներ, Ժան-Պոլ Գոտիեի նախագծած Shoulder Birkin-ը և լեգենդար Himalaya Birkin-ը, որի արժեքը աճուրդներում կարող է հասնել մինչև 500,000 դոլարի։

Նորթի հետաքրքրությունը շքեղ պայուսակների նկատմամբ նկատվել է դեռ վաղ տարիքում․ 2019 թվականին նրան տեսել են սպիտակ Birkin-ով, իսկ ավելի վաղ՝ 2014 թվականին, նա Hermès Herbag-ի վրա նկար է արել և այն նվիրել մորը։