Առողջապահության նախարարությունն առաջարկում է փոփոխել բժշկական կենտրոնների գործադիր մարմինների ձևավորման պահանջները

Գործադիր մարմինների անդամները պետք է համապատասխանեն նաև աշխատանքային փորձի բավարար պայմաններին։

ՀՀ առողջապահության նախարարությունը առաջարկում է ընդլայնել բժշկական կազմակերպությունների գործադիր մարմիններում ընդգրկվող անձանց մասնագիտական կրթության վերաբերյալ պահանջները։ Հարցը կառավարության նիստում ներկայացրել է առողջապահության նախարար Անահիտ Ավանեսյանը։

Նախարարի ներկայացմամբ՝ փոփոխությունը վերաբերում է բժշկական կազմակերպություններին, որոնք գործում են փակ բաժնետիրական ընկերության (ՓԲԸ) ձևաչափով և հանդիսանում են շահույթ հետապնդող ձեռնարկատիրական կազմակերպություններ։ Առաջարկվող կարգավորմամբ նախատեսվում է, որ գործադիր մարմիններում ընդգրկվող անձանց մասնագիտական կրթությունը պարտադիր չսահմանափակվի միայն բժշկական կրթությամբ։

Միաժամանակ սահմանվում է, որ գործադիր մարմինների անդամները պետք է համապատասխանեն նաև աշխատանքային փորձի բավարար պայմաններին՝ կառավարման և գործադիր գործունեության ոլորտում։

Առողջապահության նախարարության փոխանցմամբ՝ փոփոխության նպատակն է բարձրացնել պետական մասնաբաժին ունեցող բժշկական կենտրոնների կառավարման արդյունավետությունը, ապահովել դրանց ֆինանսական կայունությունը և զարգացման հնարավորությունները։ Նշվում է, որ նոր մոտեցումը հնարավորություն կտա ներդնել չափելի ցուցանիշներ, որոնց հիման վրա կգնահատվի բժշկական կենտրոնների ղեկավար կազմի գործունեությունը։

Առաջարկվող փոփոխությունները վերաբերում են կառավարման մոդելի կատարելագործմանը և նախատեսված են առողջապահական համակարգի կազմակերպչական արդյունավետության բարձրացման համար։