Առողջապահության ապահովագրական համակարգում գրանցվել է ավելի քան 87 հազար դեպք

Պոլիկլինիկաներում մեծ հերթեր չեն արձանագրվում։

ՀՀ առողջապահության նախարար Անահիտ Ավանեսյանը Կառավարության նիստի ընթացքում հայտնել է, որ այսօրվա ժամը 10:00-ի դրությամբ առողջապահական ապահովագրության շրջանակում գրանցվել է 87 048 ապահովագրական դեպք։

Նախարարի խոսքով՝ դրանցից 7 739-ը կազմում են ամբուլատոր այցերը, իսկ 8 612-ը՝ հիվանդանոցային դեպքերը։ Ավանեսյանը նշել է, որ արձանագրված աճի տեմպը գտնվում է կառավարության նախնական ակնկալիքների շրջանակում։

Նրա փոխանցմամբ՝ նախարարությունը հետևում է ինչպես սպասարկված դեպքերի թվին, այնպես էլ քաղաքացիների, բուժաշխատողների և բժշկական կազմակերպությունների վարչական անձնակազմի կողմից բարձրացված խնդիրներին։ Ըստ նրա՝ համակարգում իրականացվում են ընթացիկ շտկումներ՝ այն ավելի մարդակենտրոն դարձնելու և գործընթացների բարդությունը նվազեցնելու նպատակով։

Անահիտ Ավանեսյանը նաև ընդգծել է, որ այս պահին պոլիկլինիկաներում մեծ հերթեր չեն արձանագրվում, թեև որոշ ժամերի կարող են լինել ծանրաբեռնվածության պիկեր։ Հիվանդանոցային օղակում, ըստ նախարարի, իրավիճակն առավել կայուն է։

Նա նշել է, որ քաղաքացիները հաճախ զարմանում են, երբ պարզվում է, որ կարող են ստանալ բժշկական ծառայություններ առանց անմիջական վճարումների, քանի որ ապահովագրավճարները վճարվել են պետության կողմից։