Հայ ժողովուրդը ցույց կտա, որ իր կամքը մեր երկրում ուժի միակ աղբյուրն է. Միրզոյանը՝ առաջիկա ընտրությունների մասին

Ընտրական գործընթացների ընթացքում առկա են նաև արտաքին և ներքին միջամտությունների ռիսկեր։

ՀՀ արտաքին գործերի նախարար Արարատ Միրզոյանը Եվրոպայի խորհրդի խորհրդարանական վեհաժողովի (ԵԽԽՎ) նստաշրջանում հայտարարել է, որ Հայաստանը վերջին տարիներին անցկացրել է երկու արտահերթ խորհրդարանական ընտրություններ, որոնք ստացել են ինչպես ներքին, այնպես էլ արտաքին ճանաչում՝ որպես ազատ և մրցակցային։

Նախարարի խոսքով՝ այդ ընտրությունները ցույց են տվել, որ քաղաքացիների քաղաքական կամքը պետք է ամբողջությամբ և ճշգրիտ արտացոլվի ընտրական գործընթացում։

Միրզոյանը նշել է, որ 2026 թվականի հունիսին Հայաստանում նախատեսվում են հերթական խորհրդարանական ընտրություններ, որոնք դիտարկվում են որպես ժողովրդավարական գործընթացների շարունակականության և կայունության կարևոր փուլ։

ԱԳ նախարարի գնահատմամբ՝ ընտրական գործընթացների ընթացքում առկա են նաև արտաքին և ներքին միջամտությունների ռիսկեր։ Նա ընդգծել է, որ ժամանակակից միջավայրում որոշ դերակատարներ կարող են օգտագործել ֆինանսական, տեղեկատվական և մեդիա ռեսուրսներ՝ հասարակական վստահությունը խաթարելու և ընտրական գործընթացների վրա ազդեցություն գործելու նպատակով։

Միրզոյանը նշել է, որ առաջիկա ընտրությունների նախաշեմին այդպիսի ռիսկերը կարող են ավելանալ, ինչը ստեղծում է խոսքի ազատության ապահովման և ընտրական գործընթացների պաշտպանվածության միջև հավասարակշռություն պահպանելու անհրաժեշտություն։

Նրա խոսքով՝ Հայաստանի իշխանությունները մտադիր են արձագանքել այդ մարտահրավերներին բացառապես ժողովրդավարական մեխանիզմների միջոցով՝ համագործակցելով միջազգային գործընկերների հետ, այդ թվում՝ Եվրոպայի խորհրդի և ԵԽԽՎ-ի շրջանակում։

ԱԳ նախարարը նշել է, որ նպատակն է ապահովել, որպեսզի առաջիկա խորհրդարանական ընտրությունները դիտարկվեն որպես ժողովրդավարական դիմակայունության ցուցիչ։