ՀՀ արդարադատության նախարարի տեղակալ Տիգրան Դադունցն ընդունել է Ասիական զարգացման բանկի (ADB) և Սինգապուրի միջազգային հաշտարարության կենտրոնի (SIMC) պատվիրակությանը: Նախարարության մամուլի ծառայության փոխանցմամբ՝ հանդիպման ընթացքում քննարկվել են Հայաստանում վեճերի լուծման այլընտրանքային եղանակների (ADR) զարգացման ապագա հեռանկարները և համատեղ իրականացվելիք ռազմավարական նախագծերը:
Պատվիրակության կազմում եղել են ԱԶԲ-ի հայաստանյան գործառնությունների ղեկավար Սիբեշ Բհատաչարյան, գլխավոր խորհրդատուի տեղակալ Քրիստինա Պակը, մասնավոր հատվածի զարգացման գծով գլխավոր մասնագետ Նարինե Ավետիսյանը, ինչպես նաև Սինգապուրի հաշտարարության միջազգային կենտրոնի նախագահ Ջորջ Լիմը և գործադիր տնօրեն Չուան Վի Մենգը:
Դատարանների ծանրաբեռնվածության թեթևացում և միջազգային որակավորում
Տիգրան Դադունցը բարձր է գնահատել միջազգային դոնորների և մասնագիտացված կառույցների դերը Հայաստանում հաշտարարության ինստիտուտի կայացման գործում: Նշվել է, որ արտադատական կարգով վեճերի լուծման մշակույթի ներդրման շնորհիվ արդեն իսկ արձանագրվել է հայրենական դատարանների ծանրաբեռնվածության էական նվազում:
Համագործակցության հաջորդ կարևոր փուլը լինելու է տեղացի մասնագետների կրթական ցենզի բարձրացումը: Ակնկալվում է, որ համատեղ վերապատրաստումների արդյունքում շուտով մի շարք հայ հաշտարարներ կստանան միջազգային պաշտոնական որակավորում, ինչը թույլ կտա բարձրացնել ոլորտի վստահելիությունը:
Սինգապուրի կոնվենցիա. Նոր ազդակ ներդրողների համար
Քննարկումների հիմնական առանցքային թեմաներից է եղել Սինգապուրի կոնվենցիայի վավերացմանն ուղղված Հայաստանի իրավական քայլերի հաջորդականությունը:
Այս միջազգային փաստաթղթի վավերացումը հանգուցային նշանակություն կունենա երկրի համար, քանի որ այն ապահովում է միջազգային առևտրային հաշտության համաձայնությունների ուղղակի ճանաչումն ու կատարումը Հայաստանի տարածքում: Փորձագետների կարծիքով՝ ԱԶԲ-ի և Սինգապուրի (որը հանդիսանում է վեճերի լուծման գլոբալ առաջատար հաբերից մեկը) հետ այս գործակցությունը նոր հորիզոններ է բացում Հայաստանում արբիտրաժի և հաշտարարության զարգացման, ինչպես նաև գործարար միջավայրի գրավչության բարձրացման համար:
