ՀՀ կառավարությունը նոյեմբերի 5-ի նիստում հաստատել է Ֆիզիկական արհեստական բանականության (Physical AI) յոթամյա ծրագիրը, որը համադրում է ռոբոտատեխնիկան և արհեստական բանականությունը։
Ինչու է դա կարևոր. Ծրագրի ընդհանուր բյուջեն կկազմի մոտ 4.828 միլիարդ դրամ, որից առաջին տարվա համար պետությունը կհատկացնի 168.4 միլիոն դրամ։ Նախատեսվում է, որ Հայաստանում ծախսվող 3.413 մլրդ դրամը (բյուջեի 71%-ը) կապահովի շուրջ 4.44 միլիարդ դրամի համախառն ներդրում ՀՆԱ-ում։ Ծրագիրը նպատակ ունի Հայաստանը դարձնել ռոբոտատեխնիկայի և ԱԲ ոլորտի տարածաշրջանային հետազոտական կենտրոն։
Ծրագրի առանցքային մանրամասներն ու ակնկալվող արդյունքները.
Կադրային ներուժ. 7 տարվա ընթացքում նախատեսվում է պատրաստել շուրջ 330 մասնագետ՝ ներգրավելով հրավիրյալ և մշտական գիտնականների։
Ենթակառուցվածքներ. Կստեղծվեն երկու ժամանակակից ռոբոտատեխնիկական լաբորատորիաներ և կմշակվեն համատեղ կրթական ծրագրեր տեղական համալսարանների հետ։
Ստարտափ էկոհամակարգ. Ակնկալվում է, որ շրջանավարտներն ու հրավիրյալ մասնագետները կհիմնեն առնվազն 5 ստարտափ կամ դուստր ընկերություն։
Ֆինանսական ուղղվածությունը. Միջոցները կուղղվեն գիտական անձնակազմի ֆինանսավորմանը, հետազոտական ենթակառուցվածքներին, լաբորատոր սարքավորումներին, կրթական ծրագրերին և միջազգային համագործակցությանը։
