Հարավային Կովկասում արևմտյան երկրների ռազմաքաղաքական ակտիվությունը և քայլերը կարող են հանգեցնել տարածաշրջանային իրավիճակի հետագա ապակայունացման և սրման։ Այս մասին Պետերբուրգի միջազգային իրավական համաժողովի շրջանակներում հայտարարել է ՀԱՊԿ Մշտական խորհրդի գործող նախագահ Վիկտոր Վասիլևը։
Զանգեզուրի միջանցք և արևմտյան կառույցներ Իր ելույթում Վասիլևն առանձնահատուկ ուշադրություն է դարձրել Հայաստանի շուրջ ստեղծված աշխարհաքաղաքական կոնյունկտուրային՝ ուղղակիորեն մատնանշելով Միացյալ Նահանգների և Եվրոպական միության գործողությունները։
«Առանձնահատուկ պետք է կանգ առնել Հարավային Կովկասում տիրող իրավիճակի վրա՝ հաշվի առնելով նաև Հայաստանում կայանալիք ընտրությունները։ Զանգեզուրի միջանցքի անվտանգության ապահովման վերաբերյալ ԱՄՆ-ի ծրագրերը, Հայաստանն իրենց ռազմական կառույցներում ներառելու ԵՄ երկրների մտադրությունները, ինչպես նաև այս տարածաշրջանում իրականացվող այլ ոչ բարեկամական քայլերը հեռանկարում կհանգեցնեն իրավիճակի հետագա սրմանը»,- հայտարարել է ՀԱՊԿ պաշտոնյան։
«Մենք վերահսկում ենք իրավիճակը» Չնայած մտահոգություններին և արևմտյան երկրների քայլերը որպես «ոչ բարեկամական» որակելուն՝ Վասիլևն ընդգծել է, որ ռազմաքաղաքական դաշինքն ուշադիր հետևում է զարգացումներին և տիրապետում է օպերատիվ պատկերին՝ նշելով, որ իրենք վերահսկում են իրավիճակը։ Վերլուծաբանների գնահատմամբ՝ այս հայտարարությունը հնչում է Երևանի և ՀԱՊԿ-ի միջև հարաբերությունների տևական սառեցման և Հայաստանի արտաքին քաղաքական վեկտորի դիվերսիֆիկացման ֆոնին։
