ՀՀ-ում շարունակում են շրջանառվել գրիպ Ա տեսակի H3N2 ենթատեսակի հարուցիչները

Գրանցված դեպքերի գրեթե 68%-ը բաժին է ընկնում 0–18 տարեկան երեխաներին:

Հիվանդությունների վերահսկման և կանխարգելման ազգային կենտրոնի տվյալներով՝ 2026 թվականի երկրորդ շաբաթվա ընթացքում Հայաստանում սուր շնչառական վարակներով (ՍՇՎ) պայմանավորված հիվանդացության ակտիվությունը եղել է ցածր։

Գրանցված դեպքերի գրեթե 68%-ը բաժին է ընկնում 0–18 տարեկան երեխաներին, ընդ որում՝ առավել բարձր ցուցանիշը շարունակվում է արձանագրվել 0–4 տարեկանների շրջանում։

Նույն ժամանակահատվածում բժշկական կազմակերպություններում ՍՇՎ-ով հոսպիտալացումները նախորդ շաբաթվա համեմատ նվազել են 1.3 անգամ, ինչը վկայում է հիվանդացության ընդհանուր ծանրության նվազման մասին։

Հոսպիտալացված դեպքերի 92.8%-ը կազմում են 0–18 տարեկանները, ինչը հաստատում է, որ վարակների հիմնական բեռը շարունակում է ընկնել մանկական տարիքային խմբերի վրա։

Առողջապահական մարմինների տեղեկացմամբ՝ Հայաստանում շարունակում են շրջանառվել գրիպ A տեսակի H3N2 ենթատեսակի հարուցիչները։