Մեծ Բրիտանիայում մինչև 16 տարեկանների համար կարող են արգելել սոցիալական ցանցերը

Սահմանափակումները կարող են ուժի մեջ մտնել ամռանը՝ հանրային քննարկումների ավարտից հետո։

Մեծ Բրիտանիայի իշխանությունները կարող են արդեն 2026 թվականին սահմանել արգելք մինչև 16 տարեկան դեռահասների համար սոցիալական ցանցերի օգտագործման վրա։ Այդ մասին փետրվարի 16-ին հայտնել է The Times պարբերականը՝ հղում անելով կառավարության աղբյուրներին։

Աղբյուրի փոխանցմամբ՝ վարչապետ Քիր Սթարմերի հայտարարած լիազորությունների շրջանակում, որոնք ուղղված են կառավարության դիրքերի ամրապնդմանը, երեխաների մուտքը սոցիալական ցանցեր կարող է արգելվել արդեն այս տարի։

Թերթի տվյալներով՝ սահմանափակումները կարող են ուժի մեջ մտնել ամռանը՝ հանրային քննարկումների ավարտից հետո։ Նախատեսվում է, որ միջոցները կվերաբերեն ոչ միայն սոցիալական ցանցերին, այլև արհեստական բանականությամբ աշխատող չատ-բոտերին։

Բացի այդ, նախարարների կաբինետը մտադիր է պարտադրել ինտերնետային հարթակներին սահմանափակել այն ժամանակը, որը անչափահասները անցկացնում են «անվերջ թերթման» (infinite scroll) գործառույթ ունեցող ծառայություններում։

The Times-ի տեղեկություններով՝ կառավարությունը կսկսի «Ինտերնետային անվտանգության մասին օրենքի» լրամշակման հրատապ աշխատանքները։ Մասնավորապես, նախատեսվում է վերացնել առկա իրավական բացերը և պարտավորեցնել ԱԲ-ով աշխատող բոլոր չատ-բոտերի մատակարարներին պահպանել գործող օրենսդրության պահանջները՝ անօրինական բովանդակության տարածումը կանխելու նպատակով։