Կառավարությունում ներդրվել է նախարարների աշխատանքի գնահատման հավելավճարի պիլոտային համակարգ

Պետական պաշտոնյաների աշխատավարձերը վերջին 5–6 տարիների ընթացքում չեն փոփոխվել։

ՀՀ կառավարությունում ներդրվել է նախարարների աշխատանքի գնահատման հավելավճարի պիլոտային համակարգ։ Այս մասին մամուլի ասուլիսի ընթացքում հայտարարել է ՀՀ ֆինանսների նախարար Վահե Հովհաննիսյանը՝ անդրադառնալով տարեվերջին նախարարների ստացած հավելավճարների շուրջ քննարկումներին։

Ֆինանսների նախարարի խոսքով՝ պետական պաշտոնյաների աշխատավարձերը վերջին 5–6 տարիների ընթացքում չեն փոփոխվել, ինչն առաջացնում է որակյալ մասնագետների ներգրավման խնդիրներ պետական համակարգում, հատկապես մասնավոր հատվածում բարձր եկամուտներ ունեցող անձանց համար։

«Քննարկում եղել է 1-2 տարի առաջ այն մասին, որ այստեղ ինչ-որ բան է պետք անել։ Իմ դիրքորոշումն այն է եղել, որ նախարարների, փոխնախարարների կամ ղեկավար կազմի աշխատավարձերն ուղղակի բարձրացնելը ճիշտ մոտեցում չէ։ Փոխարենը պետք է ներդնել համակարգ, որտեղ կսահմանվեն հստակ թիրախներ, և կատարողականի գնահատման արդյունքում աշխատավարձի աճը լինի տարբեր՝ ըստ արդյունքների»,– նշել է Հովհաննիսյանը։

Նրա խոսքով՝ համակարգը պիլոտային կարգով ներդրվել է նախորդ տարվա սկզբին, իսկ գերատեսչությունների համար սահմանվել են թիրախային տարբեր նպատակներ։ Տարվա կեսին իրականացվել է գնահատման գործընթաց։

«Չէի ասի, որ սա պարգևավճար է․ սա աշխատավարձի բարձրացում է՝ պարզապես այլ մեխանիզմով։ Գնահատման համակարգ ներդնելը պետական համակարգում, հատկապես նախարարների համար, բավականին բարդ գործընթաց է։ Մեր հանրությունը պետք է առնվազն չզայրանա սրանից»,– ընդգծել է ֆինանսների նախարարը։