Google-ը համաձայնել է վճարել 68 մլն դոլար՝ ձայնային օգնականի վերաբերյալ խմբային հայցը կարգավորելու համար

Նմանատիպ հարցերով ավելի վաղ խմբային հայց է ներկայացվել նաև Apple ընկերության դեմ։

Google ընկերությունը համաձայնվել է վճարել 68 միլիոն դոլար՝ ԱՄՆ-ում ներկայացված խմբային հայցը կարգավորելու նպատակով։ Այդ մասին հայտնում է The Hill-ը։

Հայցը վերաբերում է «Google Assistant» ձայնային օգնականի միջոցով օգտատերերի գաղտնիության հնարավոր խախտումներին։ Հայցվորների պնդմամբ՝ որոշ սարքեր ձայնագրել են օգտատերերի անձնական խոսակցությունները նույնիսկ այն դեպքերում, երբ չեն հնչել «Hey Google» կամ «OK Google» ակտիվացման բառերը։

Ըստ հայցի նյութերի՝ նման ձայնագրությունները կատարվել են առանց օգտատերերի գիտության կամ հստակ համաձայնության, ինչը, հայցվորների գնահատմամբ, հակասել է Google-ի սեփական գաղտնիության քաղաքականությանը։

Google-ը նախնական դատական համաձայնության է եկել խմբային հայցի շրջանակում։ Ընկերությունը հրապարակային կերպով չի ընդունել մեղադրանքները, սակայն համաձայնել է ֆինանսական փոխհատուցման՝ դատական գործընթացը կարգավորելու համար։

Նշվում է, որ նմանատիպ հարցերով ավելի վաղ խմբային հայց է ներկայացվել նաև Apple ընկերության դեմ։ Այդ գործի շրջանակում Apple-ը համաձայնել էր վճարել 95 միլիոն դոլար՝ Siri ձայնային օգնականի միջոցով օգտատերերի գաղտնիության հնարավոր խախտումների վերաբերյալ պահանջները կարգավորելու նպատակով։

Ներկայացված դեպքերը ցույց են տալիս, որ ձայնային օգնականների գործառույթների և տվյալների պաշտպանության հարցերը շարունակում են մնալ իրավական կարգավորման և դատական գործընթացների ուշադրության կենտրոնում։