Google-ը Gemini չաթբոտում ներդնում է ԱԲ-գնումներ՝ Walmart-ի և խոշոր ռիթեյլերների հետ համագործակցությամբ

Առաջին փուլում Gemini-ի միջոցով ԱԲ-շոփինգի գործառույթները հասանելի կլինեն միայն ԱՄՆ օգտատերերին։

Google-ը հայտարարում է Gemini չաթբոտում գնումների գործառույթների ընդլայնման մասին՝ համագործակցելով Walmart Inc.-ի, Shopify-ի, Wayfair-ի և մի շարք այլ խոշոր մանրածախ վաճառողների հետ։

Նոր գործառույթների շրջանակում օգտատերերը որոշ գործընկեր վաճառողների մոտ կկարողանան գնումներ կատարել և վճարել անմիջապես Gemini չաթբոտի միջավայրում, առանց առանձին կայք կամ հավելված տեղափոխվելու։ Այս մասին համատեղ հայտնել են Google-ը և Walmart-ը։

Հայտարարությունը արվել է ԱՄՆ Ազգային մանրածախ առևտրի ֆեդերացիայի (NRF) տարեկան համաժողովի ընթացքում, որը տեղի է ունեցել Նյու Յորքում՝ հունվարի 11-13-ը։ Walmart-ի ապագա գլխավոր գործադիր տնօրեն Ջոն Ֆերների (պաշտոնը կստանձնի փետրվարի 1-ից) և Alphabet-ի գլխավոր տնօրեն Սունդար Պիչայիի համատեղ հայտարարության մեջ նշվում է, որ ավանդական որոնումից և հավելվածներից դեպի ԱԲ-գործակալների անցումը մանրածախ առևտրի զարգացման հաջորդ խոշոր փուլն է։

Առաջին փուլում Gemini-ի միջոցով ԱԲ-շոփինգի գործառույթները հասանելի կլինեն միայն ԱՄՆ օգտատերերին, սակայն Google-ը նախատեսում է առաջիկա ամիսներին ընդլայնել հասանելիությունը նաև այլ երկրներում։

Նշվում է, որ ոլորտում մրցակցությունն արագանում է․ 2025 թվականի հոկտեմբերին OpenAI-ն և Walmart-ը հայտարարել էին նմանատիպ համագործակցության մասին, որի շրջանակում վճարովի ChatGPT օգտատերերը կարող են ակնթարթային վճարմամբ գնումներ կատարել Walmart-ի գրեթե ամբողջ ապրանքատեսականուց՝ բացառությամբ թարմ մթերքների։