Համաշխարհային էներգետիկ ճգնաժամը սրվում է. ինչ հետևանքներ կարող է ունենալ իրավիճակը

Էներգետիկայի միջազգային գործակալությունը (IEA) Մերձավոր Արևելքում ընթացող պատերազմի պատճառով կոչ է անում հրաժարվել ավիաթռիչքներից և գազօջախների օգտագործումից։

Միջազգային էներգետիկ գործակալությունը (IEA) հանդես է եկել աշխարհի երկրների կառավարություններին ուղղված վառելիքի խնայողության վերաբերյալ առաջարկություններով՝ նպատակ ունենալով մեղմել էներգակիրների գների աճի հետևանքները։

IEA-ի գործադիր տնօրեն Ֆաթիհ Բիրոլի խոսքով՝ Մերձավոր Արևելքում ընթացող պատերազմը հանգեցրել է լուրջ էներգետիկ ճգնաժամի։

«Սա համաշխարհային նավթային շուկայի պատմության մեջ մատակարարումների ամենամեծ խափանումներից մեկն է։ Եթե արագ լուծում չլինի, հետևանքները կարող են ավելի ծանրանալ ինչպես էներգետիկ շուկաների, այնպես էլ տնտեսությունների համար»,- նշել է նա։

Կազմակերպությունը ներկայացրել է տասը հիմնական առաջարկություն, որոնք ուղղված են վառելիքի սպառման նվազեցմանը։

Դրանց թվում են՝ հեռավար աշխատանքի խրախուսումը, խոշոր քաղաքներում ավտոմեքենաների մուտքի սահմանափակումը, ավտոմեքենաների համատեղ օգտագործման զարգացումը։

Առաջարկվում է նաև բարձրացնել կոմերցիոն տրանսպորտի արդյունավետությունը, խթանել այլընտրանքային տրանսպորտի օգտագործումը ավիաթռիչքների փոխարեն և խնայել գազը՝ անցում կատարելով այլ էներգակիրների։

Նշվում է նաև արդյունաբերության մեջ հումքի այլընտրանքային տեսակների կիրառման անհրաժեշտությունը՝ գազի սպառումը նվազեցնելու նպատակով։

IEA-ն ընդգծում է, որ այս քայլերը կարող են օգնել մեղմել էներգետիկ ճգնաժամի ազդեցությունը և ապահովել շուկաների կայունությունը։