Գերմանիան 15,5 մլն եվրո կհատկացնի Հայաստանի համայնքների զարգացմանը

Կառավարությունն իր այսօրվա՝ հոկտեմբերի 2–ի նիստում հավանություն տվեց «Հայաստանի Հանրապետության կառավարության և Գերմանիայի Դաշնային Հանրապետության կառավարության միջև հայտագրերի փոխանակման ձևով կնքվող «Տեխնիկական համագործակցության մասին» համաձայնագրին։

Համաձայնագրով նախատեսվում է հետևյալ օժանդակությունը․

Մասնավոր տնտեսության զարգացում և նախնական և միջին մասնագիտական կրթություն Հայաստանում՝ մինչև 6,1 մլն եվրո։

Կենսակայուն էներգետիկա հանուն Հայաստանի համայքների կլիմայադիմացկուն զարգացման՝ մինչև 6,1 մլն եվրո,

Հայաստանի համայնքների ինտեգրված զարգացում՝ մինչև 3,1 մլն եվրո,

Ուսումնասիրությունների և մասնագետների հայաստանյան ֆոնդեր՝ մինչև 300 հազար եվրո,

ԳԴՀ կառավարությունը Համաձայնագրի 1-ին կետով ներկայացված՝ վերոնշյալ 4 ծրագրերի իրականացման համար տրամադրում է անձնակազմային և ոչ դրամական ծառայություններ, անհրաժեշտության դեպքում նաև ֆինանսական գումարներ՝ 15,6 մլն եվրո ընդհանուր արժեքով։ Նշված ծրագրերի կատարումը ԳԴՀ կառավարությունը հանձնարարում է Գերմանական Միջազգային համագործակցության ընկերությանը (ԳՄՀԸ/GIZ):

ՀՀ կառավարությունը կատարող կազմակերպություններին ազատում է բոլոր տեսակի ուղղակի հարկերից, որոնք ՀՀ-ում ծագում են։

ՀՀ կառավարությունը ԳԴՀ անունից ներմուծված ապրանքները, այդ թվում սարքերն ու ավտոմեքենաները, ազատում է բոլոր տեսակի ներմուծման և արտահանման տուրքերից, նավահանգստային և պահեստային վճարներից, ինչպես նաև բոլոր այլ պետական տուրքերից և երաշխավորում է դրանց անհետաձգելի բացթողումը։