Ջորջ և Ամալ Քլունիները ստացել են Ֆրանսիայի քաղաքացիություն

Երկրում երեխաների անձնական կյանքը պաշտպանված է։

Դերասան Ջորջ Քլունին, նրա կինը՝ մարդու իրավունքների պաշտպան Ամալ Քլունին, և նրանց երկու երեխաները ստացել են Ֆրանսիայի քաղաքացիություն։ Այս մասին հայտնում է France 24-ը։

Ըստ հրապարակման՝ Քլունիների ընտանիքը 2021 թվականին ձեռք է բերել Domaine de Canadel գինու կալվածքը Ֆրանսիայի հարավում՝ Բրինյոլ գյուղի մերձակայքում։ Ընտանիքը նաև անշարժ գույք ունի Իտալիայում, Մեծ Բրիտանիայում, Նյու Յորքում և ԱՄՆ Կենտուկի նահանգում։

Դեկտեմբերի սկզբին Ջորջ Քլունին RTL-ին տված հարցազրույցում նշել էր, որ Ֆրանսիայում գտնվող տունը այն վայրն է, որտեղ ընտանիքն իրեն առավել ապահով է զգում։ Նրա խոսքով՝ երկրում երեխաների անձնական կյանքը պաշտպանված է, մասնավորապես՝ դպրոցների մոտ պապարացիների բացակայության պատճառով։

Ավելի վաղ՝ հոկտեմբերին, դերասանը Esquire ամսագրին հայտնել էր, որ չի ցանկանա իր երեխաներին մեծացնել Լոս Անջելեսում՝ հոլիվուդյան միջավայրում։