Տարեսկզբից 5 կամ 6 ինքնասպանության փորձի դեպքեր ենք ունեցել․ Արդարադատության նախարար

Գալյանը նաև անդրադարձել է ինքնավնասման դեպքերին՝ ընդգծելով, որ դրանց թիվը էապես նվազել է։

ՀՀ արդարադատության նախարար Սրբուհի Գալյանը հայտնել է, որ 2026 թվականի սկզբից արձանագրվել է 5 կամ 6 ինքնասպանության փորձ և մեկ ավարտված ինքնասպանության դեպք։

Նրա խոսքով՝ այս տվյալները ցույց են տալիս, որ բազմաթիվ դեպքեր հնարավոր է լինում կանխել, սակայն առկա գործիքակազմը դեռևս լիարժեք բավարար չէ նման երևույթները ամբողջությամբ բացառելու համար։

Նախարարը նշել է, որ ինքնասպանության փորձերի պատճառները տարբեր են։ Օրինակ՝ մեկ դեպք արձանագրվել է պետական դավաճանության մեջ մեղադրվող անձի մոտ, իսկ երկու դեպք կապված են եղել հոգեկան առողջության խնդիրների հետ։

Գալյանը նաև անդրադարձել է ինքնավնասման դեպքերին՝ ընդգծելով, որ դրանց թիվը էապես նվազել է։

Նրա խոսքով՝ վիճակագրական թվերը կարող են խաբուսիկ լինել, քանի որ բազմաթիվ դեպքեր վերաբերում են նույն անձանց խմբին։

«Եթե տեսնում եք 100 ինքնավնասման դեպք, դրանք կարող են վերաբերել 10 անձի, ոչ թե 100 տարբեր մարդկանց»,- նշել է նախարարը։

Նա հավելել է, որ նման վարքագիծ դրսևորող անձանց խմբերը հստակ առանձնանում են, և այս երևույթը բնորոշ է ոչ միայն քրեակատարողական համակարգին, այլ նաև գլոբալ մակարդակով։