2026 թվականի ապրիլի 1-ից կենսաթոշակներն ու նպաստները կվճարվեն միայն անկանխիկ եղանակով

Մարտի 5-ից մինչև ապրիլի 1-ը ընկած ժամանակահատվածում բանկի փոփոխության վերաբերյալ դիմումներ չեն ընդունվելու։

2026 թվականի ապրիլի 1-ից Հայաստանի Հանրապետության ամբողջ տարածքում կենսաթոշակները և նպաստները կվճարվեն բացառապես անկանխիկ եղանակով։ Այդ մասին տեղեկացնում են ՀՀ աշխատանքի և սոցիալական հարցերի նախարարությունից։

Նախարարության հաղորդագրության համաձայն՝ 2026 թվականի մարտի 5-ից այն քաղաքացիների համար, որոնք մինչ այդ կենսաթոշակը կամ նպաստը ստացել են կանխիկ եղանակով և չեն ներկայացրել վճարման եղանակի փոփոխության դիմում, սպասարկող բանկի ընտրությունը կկատարվի ինքնաշխատ եղանակով՝ առանց քաղաքացու դիմումի։

Միևնույն ժամանակ նշվում է, որ մարտի 5-ից մինչև ապրիլի 1-ը ընկած ժամանակահատվածում բանկի փոփոխության վերաբերյալ դիմումներ չեն ընդունվելու։

ԱՍՀ նախարարությունը հայտնում է նաև, որ բանկերի կողմից սուրհանդակային ծառայության միջոցով քարտերի առաքում կիրականացվի բացառապես տեղաշարժման սահմանափակում ունեցող քաղաքացիների համար՝ անհրաժեշտության դեպքում սոցիալական աշխատողների մասնակցությամբ։

Նախարարությունը կոչ է անում բոլոր կենսաթոշակառուներին և նպաստառուներին մինչև 2026 թվականի մարտի 5-ը ներկայացնել վճարման եղանակի փոփոխության դիմում՝ առցանց՝ https://online.ssa.am հարթակի միջոցով կամ այցելելով Միասնական սոցիալական ծառայության ցանկացած տարածքային կենտրոն։