Ֆրանսիայում մեկնարկում է 24 երկրի մասնակցությամբ խոշորամասշտաբ զորավարժություն

Զորավարժությունների ընթացքում նախատեսվում է օգտագործել 25 ռազմածովային միավոր:

Ֆրանսիան փետրվարի 8-ին կմեկնարկի «Orion 26» ռազմավարական զորավարժությունները, որոնք նախատեսված են տևել շուրջ երեք ամիս և համարվում են վերջին տարիների ամենաընդգրկուն ռազմական մանևրներից մեկը։

BFMTV-ի հաղորդմամբ՝ զորավարժություններին կմասնակցեն 12,500 ֆրանսիացի զինծառայողներ, ինչպես նաև զինվորական ստորաբաժանումներ 24 այլ երկրներից, այդ թվում՝ ԱՄՆ-ից, Կանադայից և Արաբական Միացյալ Էմիրություններից։

Զորավարժությունների ընթացքում նախատեսվում է օգտագործել 25 ռազմածովային միավոր, այդ թվում՝ «Շարլ դը Գոլ» ավիակիրը, շուրջ 140 մարտական ավիացիոն միջոց և մոտ 1,200 անօդաչու թռչող սարք։

«Orion 26»-ի սցենարը հիմնված է հորինված Արլանդիա պետության պաշտպանության վրա՝ արտաքին ագրեսիայի պայմաններում։ Սցենարը ներառում է ժամանակակից ռազմական գործողությունների տարբեր բաղադրիչներ՝ հիբրիդային սպառնալիքներից մինչև բարձր ինտենսիվության լայնածավալ բախումներ։

Զորավարժությունների նպատակն է ստուգել բազմազգ ուժերի փոխգործակցությունը, հրամանատարական համակարգերի արդյունավետությունը և ժամանակակից պատերազմի պայմաններում զինված ուժերի գործողությունների համակարգումը։