Ֆրանսիան 325 միլիոն եվրոյով տուգանել է Google-ին

Ֆրանսիական տվյալների պաշտպանության մարմինը հայտնել է, որ տուգանել է Alphabet-ին (Google-ի մայր ընկերությունը) 325 միլիոն եվրոյով՝ Gmail-ի օգտատերերին գովազդի ոչ պատշաճ ցուցադրման և առանց Google-ի հաշիվների օգտատերերի համաձայնության քուքիների օգտագործման համար, հաղորդում է Reuters-ը։

Տեղեկատվության և ազատությունների ազգային հանձնաժողովը (CNIL)  Google-ին վեց ամիս ժամանակ է տվել երաշխավորելու համար, որ գովազդն այլևս չի ցուցադրվի Gmail-ի օգտատերերի էլեկտրոնային նամակների միջև՝ առանց նախնական համաձայնության։

Հակառակ դեպքում, Google-ը և դրա իռլանդական դուստր ձեռնարկությունը պարտավոր կլինեն վճարել 100,000 եվրո տուգանք ուշացման յուրաքանչյուր օրվա համար, ասվում է հայտարարության մեջ։

Google-ի խոսնակը նշել է, որ ընկերությունը վերանայում է որոշումը և հավելել է, որ օգտատերերը միշտ էլ վերահսկողություն են ունեցել իրենց արտադրանքներում տեսած գովազդների նկատմամբ։