Վրաստանի նախկին վարչապետ Իրակլի Ղարիբաշվիլին դատապարտվել է 5 տարվա ազատազրկման՝ փողերի լվացման գործով

Ղարիբաշվիլիի բնակարանում առգրավվել է 6.5 միլիոն դոլար կանխիկ գումար

Վրաստանի նախկին վարչապետ Իրակլի Ղարիբաշվիլին ընդունել է փողերի լվացման վերաբերյալ մեղադրանքը և դատապարտվել է հինգ տարվա ազատազրկման։ Այս մասին հայտնել է Վրաստանի գլխավոր դատախազությունը՝ նշելով, որ նախկին վարչապետի հետ կնքվել է մեղքի վերաբերյալ համաձայնագիր։

Դատախազության հայտարարության համաձայն՝ Ղարիբաշվիլին մեղավոր է ճանաչվել Վրաստանի քրեական օրենսգրքի 194-րդ հոդվածի 3-րդ մասով նախատեսված հանցագործություն կատարելու համար։ Բացի ազատազրկումից, նրան նշանակվել է նաև 1 միլիոն լարի (մոտ 370 հազար դոլար) տուգանք։

Քննությամբ պարզվել է, որ 2019–2024 թվականներին Ղարիբաշվիլին իր տարեկան ունեցվածքի հայտարարագրերում ներկայացրել է կեղծ տվյալներ՝ նշելով, թե ընտանիքի անդամներից ստացել է խոշոր գումարներ։ Դրանով, ըստ դատախազության, օրինականացվել է մասնավոր բիզնեսում անօրինական մասնակցությամբ ստացված 830 հազար լարի (մոտ 306 հազար դոլար)։

Հաղորդվում է, որ 2023–2024 թվականներին նախկին վարչապետը ձեռք է բերել երկու ավտոմեքենա՝ ընդհանուր 463.6 հազար լարի արժողությամբ, ինչպես նաև ընտանիքի անդամի միջոցով 210 հազար լարիով ձեռք է բերել անշարժ գույք ունեցող ընկերության 100% բաժնեմասը։ Բացի այդ, նա 3.6 միլիոն լարի ներդրում է կատարել ընտանիքի անդամի անունով գրանցված ՍՊԸ-ում։

Դատախազության տվյալներով՝ չհիմնավորված միջոցների զգալի մասը փոխարկվել է արտարժույթի։ 2025 թվականի հոկտեմբերի 17-ին իրականացված խուզարկության ընթացքում Ղարիբաշվիլիի բնակարանում առգրավվել է 6.5 միլիոն դոլար կանխիկ գումար։