Անտառների պահպանումը ծախս չէ, այլ կենսական ներդրում մեր էկոհամակարգերի և կայուն զարգացման համար. ՇՄ նախարար

Անտառների պահպանումը ծախս չէ, այլ կենսական ներդրում մեր էկոհամակարգերի և կայուն զարգացման համար. ՇՄ նախարար

Բնության պահպանության միջազգային միության (IUCN) բնապահպանության համաշխարհային կոնգրեսին շրջակա միջավայրի նախարար Համբարձում Մաթևոսյանը մասնակցել է «Ֆինանսական մեխանիզմների բարելավում՝ առաջնային անտառների պահպանման համար» խորագրով միջոցառմամբ։

Միջոցառումը համախմբում էր կառավարությունների, միջազգային ֆինանսական կառույցների, քաղաքացիական հասարակության, ակադեմիական շրջանակների և ՄԱԿ-ի գործակալությունների ներկայացուցիչների՝ քննարկելու առաջնային անտառների պահպանության ֆինանսավորման ամրապնդման ուղիները։

«Իմ ելույթում ընդգծեցի, որ անտառների պահպանումը ծախս չէ, այլ կենսական ներդրում է մեր էկոհամակարգերի և կայուն զարգացման համար։ Ամեն ներդրված դրամ բերում է իրական արդյունքներ՝ բերրի հողեր, կայուն ջրային համակարգեր, պաշտպանություն կլիմայական աղետներից և կենսաբազմազանության պահպանում։

Հայաստանը, լինելով աշխարհի 35 կենսաբազմազանության թեժ կետերից մեկը, մեծապես կախված է անտառային էկոհամակարգերի կայունությունից։ Դրա համար մենք ձևավորում ենք բազմամակարդակ ֆինանսավորման մոտեցում, որը համադրում է՝

- պետական և միջազգային ֆինանսական հոսքերը.

- մասնավոր հատվածի ներգրավումը.

- նորարարական լուծումները՝ ինչպես պարտք-կլիմա փոխանակումները և կենսաբազմազանության ու ածխածնի ֆինանսավորման նոր մեխանիզմները, այդ թվում՝ Փարիզյան համաձայնագրի 6-րդ հոդվածի շրջանակում գործող ածխածնային շուկան։

Այս ուղղությամբ Հայաստանը իրականացնում է անտառապահպանության և անտառվերականգնման ծրագրեր՝ համատեղելով միջազգային դրամաշնորհներն ու ազգային համաֆինանսավորումը՝ ստեղծելով կանաչ աշխատատեղեր և ապահովելով երկարաժամկետ կայունություն։

Ներկայացրեցի նաև շրջակա միջավայրի նախարարության էկոպարեկային ծառայությունը, ինչպես նաև ամբողջ երկրով մեկ անտառների մոնիթորինգի համակարգի ներդրման ծրագրերը՝ նպատակ ունենալով բարձրացնել թափանցիկությունն ու արդյունավետությունը բնապահպանական կառավարման ոլորտում»,- գրել է նախարարը։