Օտարերկրացիները ճանապարհային խախտումների վերաբերյալ կծանուցվեն ՀՀ սահմանային անցակետերում

Օրենքի ընդունմամբ փոփոխվում է ճանապարհային երթևեկության կանոնների խախտումների վարչական վարույթի իրականացման կարգը

ՀՀ Ազգային ժողովը ընդունել է «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» ՀՀ օրենքում լրացումներ կատարելու մասին օրենքը։ Այդ մասին հայտնում են ՆԳՆ ոստիկանությունից։

Օրենքի համաձայն՝ օտարերկրացիների կողմից ՀՀ-ում հաշվառված տրանսպորտային միջոցներով կատարված և տեսանկարահանող կամ լուսանկարահանող սարքերով արձանագրված ճանապարհային երթևեկության կանոնների խախտումների դեպքում վարչական տույժ նշանակելու մասին որոշումները օտարերկրացիներին կծանուցվեն ՀՀ սահմանային անցակետերում՝ ՀՀ մուտքի կամ ելքի ժամանակ։

ՆԳՆ ոստիկանությունից տեղեկացնում են, որ օտարերկրացիների տվյալները կստացվեն սահմանային էլեկտրոնային կառավարման տեղեկատվական համակարգից՝ անձնագրային տվյալներով հարցման միջոցով։

Այս համատեքստում նշվում է, որ այն ֆիզիկական և իրավաբանական անձինք, որոնք տրանսպորտային միջոցները տրամադրում են օտարերկրացիներին, վարչական մարմին ներկայացվող նյութերին պետք է կցեն նաև այն փաստաթղթի պատճենը, որով տվյալ անձը հատել է ՀՀ սահմանը։

Հակառակ դեպքում, եթե սահմանային էլեկտրոնային կառավարման տեղեկատվական համակարգում կատարված հարցման արդյունքում տվյալներ չեն ստացվում, խախտումը օտարերկրացու կողմից կատարված լինելու փաստը ապացուցված չի համարվի, և վարչական պատասխանատվությունը կկրի տրանսպորտային միջոցի սեփականատերը կամ իրավաբանական անձի ղեկավարը։

Օրենքի ընդունմամբ փոփոխվում է ճանապարհային երթևեկության կանոնների խախտումների վարչական վարույթի իրականացման կարգը՝ օտարերկրյա քաղաքացիների մասնակցությամբ դեպքերում։