Ford-ը ԱՄՆ-ում հետ կկանչի 625 հազար ավտոմեքենա ամրագոտիների խնդիրների պատճառով

Հետկանչը վերաբերում է անվտանգության գոտիների հետ կապված խնդիրներ ունեցող ավելի քան 332 հազար Mustang մեքենաներին:

Ամերիկյան Ford ավտոարտադրողը ԱՄՆ-ում հետ կկանչի մոտ 625 հազար մեքենա՝ ամրագոտիների եւ հետեւի տեսախցիկների մոնիթորների անսարքության պատճառով, հաղորդել է Reuters-ը՝ հղում կատարելով ԱՄՆ ճանապարհային երթեւեկության անվտանգության Ազգային վարչության (NHTSA) տվյալներին։

Գործակալության տվյալներով՝ հետկանչը վերաբերում է անվտանգության գոտիների հետ կապված խնդիրներ ունեցող ավելի քան 332 հազար Mustang մեքենաներին, ինչպես նաեւ հետեւի տեսախցիկների անսարքություն ունեցող 292 հազար F-250, F-350 եւ F-450 բեռնատարներին։

Կարգավորող մարմինը նշել է, որ Ford-ի դիլերները կստուգեն Mustang մեքենաների ամրագոտիները եւ անհրաժեշտության դեպքում կփոխարինեն ցանկացած անսարք մաս։ Նրանք նաեւ անվճար ծրագրային թարմացում կտրամադրեն պիկապների պատկերների մշակման մոդուլին՝ հետեւի տեսախցիկների կայանման համակարգի անսարքությունը վերացնելու համար։ Ford-ը մինչ այդ հայտարարել էր, որ ԱՄՆ-ում հետ կկանչի 2020-2021թթ. արտադրված 115 հազար 500 F-250, F-350 եւ F-450 մեքենաներ՝ ղեկային համակարգի անսարքության պատճառով։ Խնդիրը ծագել է այն թերությունից, որը կարող է հանգեցնել վերին ղեկային սյան լիսեռի առանձնացմանը, ինչը կարող է հանգեցնել մեքենայի կառավարման կորստին։