Հայաստանում առաջին սինդիկացված վարկը. 300 մլն դոլար՝ արհեստական բանականության կենտրոն ստեղծելու համար

Նախագիծը հիմնված է NVIDIA ընկերության տեխնոլոգիական լուծումների վրա:

Հայաստանի բանկային համակարգում առաջին անգամ ստորագրվել է սինդիկացված վարկային պայմանագիր՝ տեխնոլոգիական նախագծի ֆինանսավորման նպատակով։

Գործարքի շրջանակում վեց ֆինանսական կառույցներ միավորվել են՝ Firebird AI ընկերությանը տրամադրելու 300 մլն ԱՄՆ դոլարի ֆինանսավորում։ Միջոցները նախատեսված են Հրազդանում արհեստական բանականության ենթակառուցվածքի՝ տվյալների կենտրոնի կառուցման համար։

Նախագիծը հիմնված է NVIDIA ընկերության տեխնոլոգիական լուծումների վրա և նպատակ ունի ձևավորել բարձր արտադրողականությամբ հաշվարկային միջավայր՝ արհեստական բանականության զարգացման համար։

Ծրագրի իրականացումը կապված է 2025 թվականի օգոստոսի 8-ին Վաշինգտոնում ստորագրված ռազմավարական հուշագրի հետ և իրականացվում է ՀՀ և ԱՄՆ կառավարությունների աջակցությամբ, ինչպես նաև ֆինանսաբանկային համակարգի ներգրավմամբ։

Սինդիկացված վարկի գործարքը արտացոլում է ֆինանսական հատվածի համատեղ մասնակցությունը խոշոր տեխնոլոգիական նախագծերի իրականացմանը՝ հնարավորություն տալով բաշխել ռիսկերը և ապահովել մեծածավալ ֆինանսավորում։

Նախագիծը կարող է ազդել տեխնոլոգիական ենթակառուցվածքների զարգացման, ներդրումային ակտիվության և բարձր տեխնոլոգիաների ոլորտի ընդլայնման վրա։