Փետրվարի 5-ի բիզնես լուրերը

ՏԵՂԱԿԱՆ ԼՈՒՐԵՐ

Կառավարությունը սահմանել է Սևանա լճում 2026 թվականի արդյունագործական որսի չափաքանակներն ու ժամկետները
Կառավարությունը 2026 թվականի համար սահմանել է Սևանա լճում սիգի արդյունագործական որսի 550 տոննա չափաքանակ, որը կազմում է արդյունագործական պաշարի 40 տոկոսը։ Սահմանվել է նաև սիգի նախաձվադրման և ձվադրման արգելքի ժամկետը՝ 2026 թվականի նոյեմբերի 20-ից մինչև 2027 թվականի փետրվարի 1-ը։

Իրանից Հայաստան պողպատե ամրանների ներկրման սահմանափակումները կգործեն ևս 6 ամիս
Կառավարության որոշմամբ սահմանափակումները երկարաձգվել են ևս վեց ամսով։ Ըստ հաշվարկների՝ Հայաստանում և Իրանում արտադրված մեկ տոննա մետաղական ամրանների ինքնարժեքների միջև առկա է շուրջ 31,805 դրամ տարբերություն։ Որոշման նպատակը տեղական արտադրողների համար հավասար մրցակցային պայմանների ապահովումն է։

ՊՆ-ն 35 մլն դրամի չափով կֆինանսավորի սպայական կազմի զինծառայողների բնակարանի ձեռքբերման վարկը
Պաշտպանության նախարարությունը կֆինանսավորի սպայական կազմի զինծառայողների բնակարանի ձեռքբերման վարկի կանխավճարը, մայր գումարը և տոկոսները՝ մինչև 35 մլն դրամի չափով։ Զինծառայողներին կտրվի գույքի ինքնուրույն ընտրության հնարավորություն, իսկ բնակարան ձեռք բերելու սահմանափակումը միայն Երևան քաղաքով վերացվել է։

Հայաստանում 100 տարեկան անձինք կստանան միանվագ 1 մլն դրամ
2026 թվականին 100 տարին լրացած կամ լրացնող ՀՀ քաղաքացիները կստանան միանվագ 1 միլիոն դրամ պետական աջակցություն։ Տվյալ տարում աջակցություն կստանան 71 քաղաքացի։

Հայաստանը ներմուծումից ամենաշատ կախված երկրների շարքում է
Համաշխարհային բանկի հրապարակած վարկանիշում Հայաստանը զբաղեցրել է 25-րդ տեղը։ 2024 թվականի տվյալներով՝ ներմուծման և ՀՆԱ հարաբերակցությունը կազմել է 76 տոկոս։

ՄԻՋԱԶԳԱՅԻՆ ԼՈՒՐԵՐ

Ֆրանսիական կոնյակ արտադրողները կրճատում են խաղողի այգիները
Ֆրանսիացի կոնյակ արտադրողները արտադրության կրճատման նպատակով պատրաստ են նույնիսկ փոխհատուցում վճարել խաղողի այգիները հատելու համար։ Պատճառը միջազգային առևտրային լարվածությունն է և ԱՄՆ-ի ու Չինաստանի կողմից հնարավոր մաքսատուրքերի բարձրացման սպառնալիքները։

Disney-ի եռամսյակային զուտ շահույթը նվազել է 4 տոկոսով
Walt Disney ընկերության զուտ շահույթը առաջին ֆինանսական եռամսյակում նվազել է մինչև 2.48 մլրդ դոլար, իսկ եկամուտները աճել են 5 տոկոսով։

ԵՄ-ն ԱՄՆ-ին կառաջարկի գործընկերություն ռազմավարական հանքանյութերի ոլորտում
Եվրամիությունը պատրաստվում է ԱՄՆ-ին առաջարկել համագործակցություն ռազմավարական նշանակության կարևոր հանքանյութերի ոլորտում՝ նպատակ ունենալով նվազեցնել Չինաստանի ազդեցությունը համաշխարհային մատակարարման շղթաների վրա։

Ճապոնիան ԱՄՆ պետական պարտատոմսերի խոշորագույն օտարերկրյա տիրապետողն է
Ճապոնիան ԱՄՆ պետական պարտատոմսերի ամենախոշոր օտարերկրյա տիրապետողն է՝ 1.2 տրիլիոն դոլար ծավալով։ Երկրորդ տեղում Մեծ Բրիտանիան է՝ 888.5 միլիարդ դոլարով։