Փետրվարի 4-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

2025-ին պետությանը և համայնքներին վերադարձվել է շուրջ 67 մլրդ դրամ արժեքով գույք
Դատախազության միջամտությամբ 2025 թվականին պետության և համայնքների սեփականության իրավունքն է վերականգնվել կամ փաստացի տիրապետմանն է վերադարձվել շուրջ 66 մլրդ 934 մլն դրամ շուկայականին մոտարկված կադաստրային արժեքով գույք։ Վերադարձված գույքի թվում են մանկապարտեզներ, մշակույթի տուն, մարզադաշտ, բնության հուշարձան, պուրակներ և հողատարածքներ։

ՏԿԵ նախարարությունում քննարկվել են վերականգնվող էներգետիկայի և էներգաարդյունավետության օրենսդրական նախաձեռնությունները
Ներկայացվել է «Վերականգնվող էներգետիկայի և էներգաարդյունավետության մասին» օրենսդրական փաթեթի նախագիծը, որը նպատակ ունի ձևավորել ոլորտի կարգավորման նոր շրջանակ և խթանել վերականգնվող էներգիայի կիրառումն ու էներգաարդյունավետության քաղաքականության շարունակական իրականացումը։

Հայաստանում քեշբեք ստացող կենսաթոշակառուների թիվը գերազանցել է 400 հազարը
Աշխատանքի և սոցիալական հարցերի նախարար Արսեն Թորոսյանի խոսքով՝ անկանխիկ գործարքներից քեշբեք ստացող կենսաթոշակառուների թիվը անցել է 400 հազարը։ Քեշբեքի միջին չափը նախկին մոտ 4100 դրամից աճել է մինչև շուրջ 4400 դրամ։

Հատուկ հարկման համակարգ ընտրելու վերջնաժամկետը 2026-ի փետրվարի 20-ն է
ՊԵԿ-ը հիշեցնում է, որ հատուկ հարկման համակարգերում 2026 թվականի հունվարի 1-ից գործունեություն իրականացնելու հայտարարությունը պետք է ներկայացնել մինչև 2026 թվականի փետրվարի 20-ը։ Նոր գրանցված տնտեսվարողները հայտարարությունը ներկայացնում են գրանցումից հետո 20 օրվա ընթացքում։

ՊԵԿ նախագահը հյուրընկալել է Շվեդիայի հարկային գործակալության ներկայացուցիչներին
Քննարկվել են հարկային վարչարարության բարելավմանն ուղղված համագործակցության հնարավորությունները՝ ծառայությունների որակի բարձրացում, ռիսկերի կառավարում, հարկային ստուգումներ, տեղեկատվության ավտոմատ փոխանակում և կարողությունների զարգացում։

ՄԻՋԱԶԳԱՅԻՆ ԼՈՒՐԵՐ

Իլոն Մասկը դարձել է պատմության մեջ առաջին մարդը, ում կարողությունը գերազանցել է 800 մլրդ դոլարը
Forbes-ի տվյալներով՝ Իլոն Մասկի կարողությունը SpaceX-ի և xAI-ի միավորման արդյունքում աճել է 84 մլրդ դոլարով՝ հասնելով ռեկորդային 852 մլրդ դոլարի։

ԱՄՆ-ը հաստատել է Սաուդյան Արաբիային մինչև 3 մլրդ դոլարի F-15 կործանիչների սպասարկման ծառայությունների հնարավոր տրամադրումը
ԱՄՆ Պետդեպարտամենտի հայտարարությամբ՝ սպասարկման ծառայությունների և սարքավորումների տրամադրումը չի վնասի ԱՄՆ զինված ուժերի մարտունակությանը։

ԱՄՆ-ում բնական գազի գինը հունվարին աճել է 1,8 անգամ
Բնական գազի գինը ԱՄՆ-ում հունվարին հասել է ավելի քան երկու տարվա առավելագույն մակարդակին՝ բարձրանալով մինչև 7.58 դոլար։ Գների աճը պայմանավորված է ուժեղ ցրտահարությամբ և պահանջարկի ավելացմամբ։

ԱՄՆ-ն Վենեսուելային փոխանցել է 500 մլն դոլար՝ նավթի խմբաքանակի վաճառքի դիմաց
Reuters-ի փոխանցմամբ՝ Վաշինգտոնը ապագայում մտադիր է վենեսուելական նավթի վաճառքից ստացված միջոցները փոխանցել ԱՄՆ-ում գտնվող հատուկ հիմնադրամի։