Փետրվարի 27-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

2025-ին ՀՀ–ՌԴ առևտրաշրջանառությունը նվազել է ավելի քան 38%-ով

2025 թվականին Հայաստանի և Ռուսաստանի միջև առևտրաշրջանառությունը նվազել է ավելի քան 38%-ով։ Միևնույն ժամանակ շարունակվել է բարձր մակարդակի քաղաքական երկխոսությունը․ վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև կայացել է 4 հանդիպում և 5 հեռախոսազրույց։

Ինչ միջակայքերում են ավանդների տոկոսադրույքները

2026 թվականի փետրվարին Հայաստանում ավանդների տոկոսադրույքները ձևավորվում են հետևյալ միջակայքերում
դրամով՝ 6.5%-ից մինչև 10.25%
ԱՄՆ դոլարով՝ 1.9%-ից մինչև 5%
եվրոյով՝ 0.5%-ից մինչև 2.5%
Առաջարկների մեծ մասը կենտրոնացված է նեղ միջակայքերում։

Տեխնոլոգիական ոլորտի շրջանառությունը կազմել է 2.6 մլրդ դոլար

2025 թվականին Հայաստանի տեխնոլոգիական ոլորտի շրջանառությունը կազմել է 2.6 մլրդ դոլար։ Գործում է առնվազն երեք աշխատակից ունեցող 1,286 ակտիվ տեխնոլոգիական ընկերություն։ Տարվա ընթացքում հիմնադրվել է 167 նոր ընկերություն, իսկ 97-ը դադարեցրել են գործունեությունը։

ԵԱԶԲ-ն հաստատել է 5.3% աճի կանխատեսումը

Եվրասիական զարգացման բանկը 2026 թվականի համար կանխատեսում է Հայաստանի տնտեսության 5.3% աճ։ 2025 թվականին ՀՆԱ-ի աճը կազմել է 7.2%։ Աճին ամենամեծ նպաստը բերել են ծառայությունների ոլորտը և շինարարությունը։

Պետական աջակցությամբ ստեղծվել է 85 հա ջերմատուն

Պետական ծրագրով հիմնվել է շուրջ 85 հա ջերմատնային տնտեսություն, իսկ ևս 64 հա կառուցման փուլում է։ Ծրագրի վարկային պորտֆելը գերազանցել է 43 մլրդ դրամը։

ՄԻՋԱԶԳԱՅԻՆ ԼՈՒՐԵՐ

ԱՄՀ-ն հաստատել է Ուկրաինային 8.1 մլրդ դոլարի վարկ

Արժույթի միջազգային հիմնադրամը հաստատել է Ուկրաինային 8.1 մլրդ դոլարի չորսամյա վարկային ծրագիր։ Առաջին 1.5 մլրդ դոլարը կտրամադրվի անմիջապես։

Netflix-ը հրաժարվել է Warner Bros. Discovery-ն ձեռք բերելուց

Netflix-ը հրաժարվել է Warner Bros. Discovery-ի ձեռքբերման գործարքից։ Paramount-ը պատրաստ է առաջարկել մինչև 31 դոլար մեկ բաժնետոմսի դիմաց, ինչը գործարքի արժեքը կարող է հասցնել շուրջ 111 մլրդ դոլարի։

Instagram-ը կծանուցի ծնողներին վտանգավոր որոնումների դեպքում

Instagram-ը կսկսի ծանուցել ծնողներին, եթե դեռահաս օգտատերերը բազմիցս որոնեն ինքնասպանության կամ ինքնավնասմանն առնչվող բովանդակություն։ Համակարգը նախ կգործարկվի ԱՄՆ-ում, Մեծ Բրիտանիայում, Ավստրալիայում և Կանադայում։

Վրաստանի միջազգային պահուստները հասել են 6.3 մլրդ դոլարի

Վրաստանի միջազգային պահուստները հասել են 6.3 մլրդ դոլարի՝ մեկ տարվա ընթացքում աճելով 1.86 մլրդ դոլարով։ Աճը պայմանավորված է արտարժույթի գնումներով և ոսկու գների բարձրացմամբ։