Փետրվարի 23-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

S&P Global-ը Հայաստանի վարկանիշի հեռանկարը դարձրել է «դրական»

S&P Global վարկանիշային գործակալությունը վերանայել է Հայաստանի վարկանիշի հեռանկարը՝ այն դարձնելով «դրական»։ Գործակալությունը նշել է տարածաշրջանային իրավիճակի հնարավոր բարելավումը, տնտեսական աճի դրական սպասումները, ինչպես նաև արտաքին ցնցումները կլանելու կարողությունը՝ բարձր միջազգային պահուստների և ճկուն փոխարժեքային քաղաքականության շնորհիվ։

Հայաստանը մրգի և բանջարեղենի պահածոների՝ Ռուսաստան մատակարարողների առաջին տասնյակում է

Հայաստանը մրգի և բանջարեղենի պահածոների՝ Ռուսաստան մատակարարողների առաջին տասնյակում է։ 2025 թվականին Ռուսաստանը ներմուծել է գրեթե 90 հազար տոննա պահածո՝ ավելի քան 131 մլն դոլարի, ինչը 10% աճ է դրամական արտահայտությամբ։

ԵԱՏՄ երկրներում ուղևորաշրջանառության ամենափոքր աճը գրանցվել է Հայաստանում

2025 թվականի հունվար–նոյեմբերին Հայաստանում ուղևորաշրջանառության աճը կազմել է 0.3%՝ ԵԱՏՄ երկրների շարքում ամենացածր ցուցանիշը։ Ամենաբարձր աճը գրանցվել է Ղազախստանում՝ 7.6%։

Երրորդ և հաջորդ երեխայի նպաստը դարձել է պետական նպաստ

Կառավարությունը հաստատել է երրորդ և հաջորդ երեխայի նպաստների տրամադրման կարգը։ Տարեկան կտրվածքով ընտանիքները կստանան 600 հազար դրամ աջակցություն, և նպաստը համարվում է պետական։

ՄԻՋԱԶԳԱՅԻՆ ԼՈՒՐԵՐ

Վրաստանը 2024-ին ավելի շատ օտարերկրյա ուղղակի ներդրում է ստացել, քան Հայաստանն ու Ադրբեջանը միասին

ՄԱԿ-ի տվյալներով՝ 2024 թվականին Վրաստանը ներգրավել է 1.334 մլրդ դոլարի օտարերկրյա ուղղակի ներդրում։ Նույն ժամանակահատվածում Հայաստանում ներդրումները կազմել են 139 մլն դոլար, Ադրբեջանում՝ 231 մլն դոլար։

Իսպանիայում 2025 թվականին ռեկորդային քանակությամբ բնակարաններ են վաճառվել

2025 թվականին Իսպանիայում վաճառվել է ավելի քան 714 հազար բնակարան՝ ամենաբարձր ցուցանիշը 2007 թվականից ի վեր։ Մեկ քմ-ի միջին արժեքը կազմել է 2230 եվրո։

Եգիպտոսը բարձրացնում է մուտքի վիզայի վճարները

Մարտի 1-ից Եգիպտոսում միանգամյա մուտքի վիզայի արժեքը կբարձրանա 25 դոլարից մինչև 30 դոլար։ Բազմակի մուտքի վիզայի արժեքը կմնա 60 դոլար։

Չինաստանը կոչ է անում ԱՄՆ-ին վերացնել միակողմանի մաքսատուրքերը

Չինաստանի Առևտրի նախարարությունը կոչ է արել ԱՄՆ-ին չեղարկել միակողմանի մաքսատուրքերը՝ նշելով, որ առևտրային համագործակցությունը շահավետ է երկու կողմերի համար։

Վրաստանում օտարերկրացիներին կարգելվի աշխատել առաքման և ուղևորափոխադրումների ոլորտներում

Մարտի 1-ից մշտական կացության կարգավիճակ չունեցող օտարերկրացիներին Վրաստանում կարգելվի աշխատել առաքման, ուղևորափոխադրումների և զբոսավարման ծառայությունների ոլորտներում։